काठमाडौं । सभामुखसहित प्रमुख तीन दलका शीर्ष नेताहरूको बैठक स्थगन गरिएको छ । आज बस्ने भनिएको बैठक स्थगन गरिएको सभामुख देवराज घिमिरेका सञ्चार सल्लाहकार शेखर अधिकारीले जानकारी दिए ।

दिउँसो १ बजे सिंहदरबारस्थित सभामुखको कार्यकक्षमा बस्ने गरी बैठक बोलाइएको थियो । बैठकमा सभामुख घिमिरेसहित प्रधानमन्त्री एवं नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’, नेपाली कांग्रेसका सभापति शेरबहादुर देउवा, नेकपा (एमाले)का अध्यक्ष केपी शर्मा ओलीलगायत नेताहरू सहभागी हुने भनिएको थियो ।

तर, एमाले अध्यक्ष ओलीको स्वास्थ्यमा समस्या आएपछि बैठक स्थगन भएको बुझिएको छ । अब बैठक कहिले बस्ने भन्ने टुंगो छैन ।

सभामुखले संसद्को ‘बिजनेस’, संयुक्त समिति, विषयगत समिति र संयुक्त नियमावली मस्यौदा समिति गठनलगायत विषयमा सहमति जुटाउन निरन्तर संवाद गरिरहेका छन् । विशेष गरी संक्रमणकालीन न्यायलाई निकास दिन संसद्मा प्रस्तुत गरिएको विधेयक संसदीय समितिमा नलगी पारित गर्ने विषयमा सहमति जुटाउने सत्ता गठबन्धनको तयारी छ ।