जिल्ला प्रहरी कार्यालय मोरङमा उजुरी दर्ता गराउँदै तुलसी सहकारीका निक्षेपकर्ता ।

विराटनगर । मोरङ आसपास तीन जिल्लामा कारोबार गर्दै आएको तुलसी सहकारी संस्थाका साढे २१ हजार निक्षेपकर्ताको डेढ अर्ब रुपैयाँ जोखिममा परेको छ । सहकारी संस्थाका सदस्य तथा निक्षेपकर्ताले प्रहरीमा ठगीविरुद्धको उजुरी दिएका छन् ।

जिल्ला प्रहरी कार्यालय मोरङका अनुसार सहकारीको रकम जोखिममा परेर निक्षेप फिर्ता नपाएको भन्दै १२१ जनाले उजुरी दर्ता गराएका छन् । सहकारीका सञ्चालक र कर्मचारी समेत आठजनाविरुद्ध अनुसन्धान अघि बढाइएको मोरङ प्रहरी प्रमुख एवं एसपी दीपक पोखरेलले जानकारी दिए । पक्राउ परेका तीनजनालाई अदालतबाट म्याद थप गरी अनुसन्धान अघि बढाइएको उनले बताए ।

तुलसी सहकारी नेपालभर कार्यक्षेत्र रहने गरी ०५२ चैत १३ गते सहकारी विभागमा दर्ता भएको थियो । उक्त सहकारीको केन्द्रीय कार्यालय विराटनगर महानगरपालिका–२ मा रहेको छ । संस्थाका देशभर २१ हजार ७१३ सदस्य छन् । तीमध्ये चार हजारभन्दा बढी सदस्य विराटनगरमा छन् ।

एसपी पोखरेलले भने, “विराटनगरसहित मोरङका चार हजार निक्षेपकर्ताको १२ करोड नौ लाख चार हजार ४८७ रुपैयाँबराबरको रकम ठगी गरेको र सो असुलउपर गराउन माग गर्दै उजुरी परेको छ ।”

सोमबार पनि जिल्ला प्रहरी कार्यालयमा सोसम्बन्धी उजुरी दर्ता गराउनेको भीड लाग्यो ।

मोरङको उर्लाबारी नगरपालिका–६ मा बस्ने संस्थाका उपाध्यक्ष अनिता गौतम, झापाको भद्रपुर नगरपालिका–३ घर भई विराटनगर–२ मा बस्ने सहकारीका सचिव सविना न्यौपाने र विराटनगर–२ मै बस्ने संस्थाका क्षेत्रीय प्रबन्धक मन्दीप खवासलाई प्रहरीले पक्राउ गरेको छ ।

विराटनगरको पुष्पलालचोककी रन्जना सुवेदीले सहकारीमा दैनिक बचत गर्ने गरेकी थिइन् । एक्कासि सहकारी बन्द भएको खबर पाएपछि उजुरी दर्ता गर्न जिल्ला प्रहरी कार्यालय पुगेको उनले बताइन् । “मैले दैनिक रूपमा ७० हजार रुपैयाँ जम्मा गरेकी थिएँ । तर, फिर्ता लिन सहकारीको कार्यालय जाँदा बन्द रहेछ,” उनले भनिन् ।

विराटनगरकै पञ्चमाया तामाङ छरछिमेकीले ‘सहकारी डुब्यो’ भनेपछि संस्थाको कार्यालयमा पुगेकी थिइन् । तर, त्यहाँ कोही कर्मचारी फेला नपरेपछि प्रहरी कार्यालय आएको उनले सुनाइन् ।

हाल सहकारीको शाखा तथा सेवा केन्द्र झापाको दमक, उदयपुरको गाईघाट र सिरहाको गोलबजारमा सञ्चालनमा छ । बाल बचत, ज्येष्ठ नागरिक बचत, भविष्य सुनिश्चित बचत, सुपर पेन्सन बचत, अवधि बचत, कर्मचारी चल्ती बचत, विशेष बचत, साधारण बचत खाताहरूमा बचत गर्दा र संस्थाको सेयर सदस्य हुँदा १५ प्रतिशतभन्दा बढी ब्याज, बोनसलगायत आकर्षक आर्थिक सुविधा पाउने आश्वासन र प्रलोभनमा पारिएको प्रहरीको प्रारम्भिक अनुसन्धानका क्रममा खुलेको छ । आफ्नो र परिवारका सदस्यको सुरक्षित भविष्यको आशामा बचतकर्ताले रकम जम्मा गरेको पाइएको छ ।

संस्थाका अध्यक्ष केदारनाथ शर्माको खोजीकार्य अघि बढाइएको प्रहरीले जनाएको छ । बचतकर्ताको रकम जोखिममा परेसँगै शर्मा फरार छन् । उजुरी परेका अरू पाँच सञ्चालक समेत सम्पर्कमा छैनन् । एसपी पोखरेलले बाह्रखरीसित भने, “हामी सबैको खोजीमा लागिरहेका छौँ ।”

नेपाल प्रहरीको केन्द्रीय अनुसन्धान ब्युरो (सीआईबी)को सहयोग लिएर अनुसन्धान तथा खोजीकार्य अघि बढाइएको उनले बताए । “हालसम्मको प्रारम्भिक अनुसन्धानबाट योजनाबद्ध तरिकाले ठूलो रकम हिनामिना गरी संस्थाका सदस्य एवं बचतकर्ताहरूलाई ठगी गरेको देखिएको छ,” उनले भने ।

सहकारीपीडितलाई पाँच दिनभित्र प्रहरी कार्यालयमा उजुरी दिन आग्रह गरिएको छ । एसपी पोखरेलका अनुसार मोरङका निक्षेपकर्ताको मात्र ६० करोड रुपैयाँ जोखिममा परेको देखिएको छ ।