नेपाली कांग्रेसका वरिष्ठ नेता रामचन्द्र पौडेल नेपालका तेस्रा राष्ट्रपति निर्वाचित भएका छन् । नवनिर्वाचित राष्ट्रपति पौडेललाई संसद्का ९ वटा दलले साझा उमेदवारका रूपमा समर्थन गरेका थिए ।

राष्ट्रपति पदकै गरिमा खस्केका बेला पौडेल निर्वाचित भएका छन् । उनको कदका नेता राष्ट्रपति भएपछि यस पदको साख फर्कने अपेक्षा धेरैले राखेको देखिएको छ । 

नेपालका प्रथम राष्ट्रपति डा. रामवरण यादव पनि नेपाली कांग्रेसकै नेता थिए । निवर्तमान राष्ट्रपति विद्यादेवी भण्डारी नेपाल कम्युनिस्ट पार्टी (एमाले)की उपाध्यक्ष थिइन् । 

पौडेल उनका पूर्ववर्तीहरूभन्दा उमेर र अनुभवमा मात्र होइन राजनीतिक सङ्घर्षका आधारमा पनि निकै वरिष्ठ हुन् । यसले एकातिर राष्ट्रपति पदको ओज बढाएको छ भने अर्कातिर पौडेलका लागि चुनौती पनि थपेको छ ।

सभामुख रहिसकेका नवनिर्वाचित राष्ट्रपति पौडेल नेपालमा संसदीय लोकतन्त्रको स्थापनाका लागि दशकौं सङ्घर्ष गरेका छन् । त्यसैले पनि उनले संवैधानिक राष्ट्रपतिको सीमा र दायित्व दुवै बुझेका छन् भन्ने विश्वास गर्न सकिन्छ ।

निवर्तमान राष्ट्रपति भण्डारीको कार्यकाल बढी नै विवादास्पद रह्यो । संविधानका भावना मिच्नमात्र होइन अक्षरकै उल्लङ्घन गर्न पनि हिचकिचाइनन् । एमाले अध्यक्ष तथा तत्कालीन प्रधानमन्त्री खड्गप्रसाद ओलीका पक्षमा उनले देखाएको झुकावले पदकै गरिमा गिराएको थियो ।

यसैगरी राष्ट्रपतिहरूले राजसी विलास अपनाएको पनि जनसाधारणलाई मन परेको छैन । विशेषगरी राष्ट्रपतिको आवागमनमा घन्टौं सडक बन्द गरेर दिइने सास्तीले पनि जनता धेरै चिडिएका देखिन्छन् ।  

नवनिर्वाचित राष्ट्रपति पौडेल यी सबै अवस्था र समस्याका बारेमा अनभिज्ञ पक्कै छैनन् । यसैले कार्यकालको आरम्भदेखि नै त्यस्ता कमजोरी र आशक्ति त्याग गर्न उनी सचेत रहने अपेक्षा गर्नु अन्यथा नहोला ।

नेपालका वरिष्ठ र अपेक्षाकृत स्वच्छ छविका राजनीतिक नेतामध्येका रामचन्द्र पौडेल राष्ट्रपति हुँदा पनि पदको गरिमा बढाउन नसके गणतन्त्रप्रति नै वितृष्णा बढ्न सक्छ । सम्भवतः उनका लागि सबैभन्दा ठूलो चुनौती यही हो । 

राष्ट्रपति पदको गरिमा बढाउन र नेपालको राजनीतिमा मानक कायम गर्न नवनिर्वाचित राष्ट्रपति रामचन्द्र पौडेललाई सफलता प्राप्त होस् यही शुभकामना १ संविधानको संरक्षण र पालना त राष्ट्रपतिको कर्तव्य नै भयो ।