काठमाडौं । नेपाल प्रहरीका सई कुवेर कार्की हत्या अनुसन्धानको फाइल प्रहरीले फेरि खोतल्न सुरु गरेको छ ।

उपत्यका अपराध अनुसन्धान कार्यालयले हत्या अनुसन्धानमा फेरि सक्रियता देखाएको हो ।

०६३ मंसिर २० गते काठमाडौंको गोठाटारस्थित आफ्नै निवासमा सुतिरहेका बेला सई कार्कीलाई कोठाबाट घिसारेर अज्ञात व्यक्तिले अन्धाधुन्ध खुकुरी प्रहार गरि घाइते बनाएका  थिए ।

उपचारकै क्रममा उनको क्रममा मृत्यु भएको थियो । कार्की तत्कालीन समयमा कांग्रेस नेता पूर्वमन्त्री खुम्बहादुर खड्काका पीएसओ थिए ।

उनको हत्या भएको १६ वर्ष बितिसक्दा पनि हत्यारासम्म पुग्न प्रहरी असफल भएको छ ।

घटनाको समयमा प्रहरी सक्रिय भए पनि त्यसपछि अनुसन्धान रोकिएजस्तै भएको थियो । तर उपत्यका अपराध अनुसन्धान कार्यालयले अनुसन्धान फेरि सुरु गरेको छ । तर अभियुक्तसम्म पुग्ने ‘क्लु’ र प्रमाण छैन ।

प्रहरीले परिवारकै सदस्यले अनुसन्धानमा सहयोग नगरेको गुनासो गर्दै आएको छ ।

हत्या भएको रात उनी श्रीमतीसँगै थिए । तर उनकी श्रीमती रञ्जुले आफुलाई घटनाबारे केही थाहा नभएको बताएकी थिइन् ।

उनले तत्कालीन समयमा प्रहरीलाई भनेकी थिइन्, “हामी सँगै सुतेका थियौं । राति १ बजेतिर कोठाको चुकुल फोडेर केही व्यक्ति कोठामा पुगेछन् । मसँगै सुतेका मेरो श्रीमान्लाई लगेछन् । म सुतेको थिएँ । पछि बाहिर बचाउ बचाउ भनेको आवाज सुनेँ । म बाहिर आएर हेर्दा उहाँ घाइते हुनुहुन्थ्यो । उहाँमाथि किन आक्रमण भयो मलाई केही थाहा छैन ।”

तर उनले तत्कालीन समयमै १३ दिनपछि घटनाको बारेमा केही बताउने भनेर बोलेको तत्कालीन समयमा अनुसन्धानमा खटिएका एक अधिकारी बताउँछन् ।

अनुसन्धानमा खटिएका अधिकारीहरुका अनुसार कार्कीले सधैं सुत्ने स्थान नजिकै पेस्तोल राख्ने गरेका थिए । तर घटना भएको रात उनको पेस्तोल श्रीमतीले दराजमा राखिदिएको खुलेको थियो ।

घटनालाई पुष्टि गर्ने प्राविधिक आधार नभएकाले जटिलता थपिएको अधिकारीहरु बताउँछन् । पारिवारिक र प्रेम सम्बन्धका कारण घटना भएको हुनसक्ने प्रहरी अधिकारीहरुको आशंका छ ।

प्रहरीका अनुसार घटनाको दिन सई कार्कीको घरभित्र प्रवेश गर्दा उनको घरको मूल ढोका बन्द अवस्थामा थियो । उनको एकतले घर थियो ।

हत्यारा घरको छतबाट भित्र पसेको हुनसक्ने प्रहरी अनुमान छ । छतको ढोका पनि खुला अवस्थामा भेटिएको थियो ।

प्रहरीले सो समयमा विभिन्न व्यक्तिसँग सोधपुछ गरे पनि कसैलाई नियन्त्रणमा भने लिएको थिएन ।