काठमाडौं । नेपाली कथानक चलचित्र ‘पशुपति प्रसाद–२ भस्मे डन’ बन्ने भएको छ । ‘पशुपति प्रसाद’को मुख्य पात्रमध्येको एक भस्मेडनको कथामा ‘भस्मे डन’ टाइटलमा चलचित्र निर्माणको तयारीमा रहेको निर्माण पक्षले नाममा परिवर्तन गर्दै ‘पशुपतिप्रसाद–२ भस्मे डन’ टाइटलमा चलचित्र बनाउन लागेको हो ।
लोकप्रिय भइसकेको नामलाई निर्माण पक्षले छोड्न नचाहेको बताइएको छ । पशुपतिप्रसाद आफैंमा ब्राण्ड बनिसकेको र त्यसलाई निरन्तरता दिनु पर्छ भन्ने निष्कर्षमा आफूहरू पुगेको निर्देशक दीपेन्द्र के खनालले जानकारी दिए ।
“हामीले सुरुमा भस्मे डन टाइटलमा चलचित्र बनाउने भनेका थियौं । तर, धेरैको सुझाव पशुपतिप्रसाद टाइललाई नछोडौं भन्ने रह्यो । त्यसैले पशुपतिप्रसाद–२ भस्मे डन नाम राख्ने निर्णय भएको छ,” उनले भने ।
चलचित्रको मुख्य पात्र भने भस्मे डन नै हो । भष्मे डनको भूमिकामा विपीन कार्की हुनेछन् । ‘पशुपतिप्रसाद’मा उनले गरेको क्यारेक्टर लोकप्रिय भएको थियो । सोही भूमिकाबाट नेपाली रजतपटमा विपीनको उदय भएको थियो । अहिले उनी कमिर्सयल हुन् अथवा क्रिएटिभ दुवै फिल्मका रोजाइका अभिनेता हुन् ।
विपीनको अपोजिटमा स्वतस्तिमा खड्का देखिने छिन् । स्वस्तिमासँग निर्माण पक्षले आज सम्झौता गरेको छ ।
विपीनसँगै सौगात मल्ल पनि यो सिनेमामा सौगात मल्ल पनि देखिनेछन् । मित बाको क्यारेक्टरमा प्रकाश घिमिरे नै हुने निर्देशक खनालले जानकारी दिए । अन्य कलाकार टुंगो लागि सकेको छैन ।
दीपेन्द्र के खनालले निर्देशन गर्ने चलचित्रको कथा खगेन्द्र लामिछानेले लेखेका छन् । ‘पशुपतिप्रसाद–२ भस्मे डन’का निर्माता पनि खगेन्द्र स्वयं हुन् ।
चलचित्र फागुन १२ गतेबाट छायांकनमा जानेछ । पशुपतिनाथको मन्दिर वरपर छायांकन हुने चलचित्र आउँदो दसैंमा रिलिज हुनेछ ।
