बुटवल । नेकपा (एमाले), नेकपा (माओवादी केन्द्र)सहितका सातदलीय गठबन्धको नेतृत्वमा नै प्रदेश सरकारहरू बन्ने सम्भावना बढी छ । लुम्बिनी प्रदेशमा पनि यही गठबन्धनको सरकार गठन हुने देखिएको छ ।

८७ सदस्यीय लुम्बिनी प्रदेशसभामा बहुमतको सरकार गठनका लागि कप्तीमा ४४ सांसद आवश्यक पर्छ । यहाँ एमाले नेतृत्वको गठबन्धनमा ५३ प्रदेशसभा सदस्य रहेको देखिन्छ ।

केन्द्रीय राजनीतिमा एमाले र माओवादी केन्द्रसँगै राष्ट्रिय प्रजातन्त्र पार्टी (राप्रपा), जनता समाजवादी पार्टी (जसपा), रवि लामिछाने नेतृत्वको राष्ट्रिय स्वतन्त्र पार्टी (रास्वपा), सीके राउत नेतृत्वको जनमत पार्टी र रेशम चौधरी नेतृत्वको नागरिक उन्मुक्ति पार्टी मिलेपछि लुम्बिनीमा बहुमत जुटाउन सहज भएको हो ।

प्रदेशमा सबैभन्दा ठूलो दल एमालेका २९, माओवादी केन्द्रका १०, राप्रपाका चार, नागरिक उन्मुक्ति पार्टीका चार, जसपाका तीन र जनमत पार्टीका तीन सांसद छन् ।

लुम्बिनीमा दोस्रो दल बनेको नेपाली कांगेसका २७, लोकतान्त्रिक समाजवादी पार्टी (लोसपा)का तीन, राष्ट्रिय जनमोर्चा र नेकपा (एकीकृत समाजवादी)का एक/एक सांसद छन् । दुई स्वतन्त्र सांसद पनि छन् ।

संविधानको व्यवस्थाअनुसार निर्वाचन परिणाम प्रदेश प्रमुखलाई बुझाएको ३० दिनभित्र मुख्यमन्त्री चयन गर्नुपर्ने हुन्छ । त्यसानुसार यही पुसको अन्तिम सातासम्म मुख्यमन्त्री चयन गरिसक्नुपर्छ ।

नेपालको संविधानको धारा १८२ मा प्रदेशसभाको पहिलो बैठक सुरु भएको १५ दिनभित्र सभामुख चयन गर्नुपर्ने व्यवस्था छ । गएको सोमबार वर्तमान प्रदेशसभाको पहिलो बैठक बसेको थियो । अब माघ ३ गतेका बैठक बोलाइएको छ । लुम्बिनी प्रदेशसभाले माघ ३ मै सभामुख पाउनेछ ।

गिरी कि महरा ?
दलका प्रदेशस्तरीय नेताहरू जति सक्रिय भए पनि राजनीतिक कदमका लागि केन्द्रीय निर्णय कुर्ने गरेका छन् । यद्यपि, सबैभन्दा ठूलो दलको हैसियतले एमालेले लुम्बिनी सरकारको नेतृत्व गर्ने सम्भावना बढी छ । एमालेबाट संसदीय दलको नेतामा लीला गिरी चयन भएकाले उनी नै मुख्यमन्त्री बन्न सक्नेछन् । एमाले नेता यहाँ मुख्यमन्त्रीमा गिरीको सम्भावना बढी रहेको बताउँछन् ।

माओवादी केन्द्रले पनि नयाँ मुख्यमन्त्रीमा दाबी गरिरहेको छ । दलका नेता एवं रोल्पा क्षेत्र नम्बर–१ ‘क’बाट निर्वाचित जोखबहादुर महरा मुख्यमन्त्री सक्ने सम्भावना पनि छ ।

एमालेले मुख्यमन्त्री पाएमा माआवादी केन्द्रले प्रदेश सभामुख पाउन सक्छ । माओवादीले मुख्यमन्त्री पाएमा एमालेले सभामुख पाउने सहमति हुनसक्छ ।