काठमाडौं । प्रहरीले २०६९ असोज १७ गते ललितपुरमा हत्या गरिएका दिवाकर चन्द हत्या अनुसन्धान १० वर्षपछि फेरि सुरु गरेको छ ।
प्रारम्भीक अनुसन्धानमा प्रहरीले सम्पत्तिकै विषयलाई लिएर उनको हत्या भएको हुनसक्ने निष्कर्ष निकालेको छ ।
केन्द्रीय अनुसन्धान ब्यूरो (सीआईबी) र उपत्यका अपराध अनुसन्धान कार्यालयले रोकिएको अनुसन्धान फेरि सुरु गरेको हो ।
हत्या गरिएका चन्द राजा त्रिभुवनका पनातिनी ज्वाइँ हुन् । बैतडी पुर्ख्यौली घर भएका चन्द श्रीमतीसँग सम्बन्ध विच्छेद भएपछि ललितपुर धोविघाटमा भाडामा फ्ल्याटमा बस्दै आएका थिए ।
दिवाकर पञ्चायतकालमा रानी ऐश्वर्यको अध्यक्षतामा गठित सामाजिक सेवा राष्ट्रिय समन्वय परिषद्को सदस्य–सचिवसमेत भएका थिए ।
यसबाहेक उनी विश्व हिन्दु महासंघका तत्कालीन वरिष्ठ उपाध्यक्ष समेत थिए ।
तत्कालीन समयमा अनुसन्धानमा सक्रिय प्रहरी अधिकारीहरुका अनुसार बाहिरबाट कोठा बन्द भएकाले प्रहरीले प्रारम्भीक रुपमा चन्दको हत्या भएको आशंका गरेको थियो ।
प्रहरीले चन्दको हत्या सम्पत्ति र आर्थिक कारणले भएको दाबी गर्दै आएको छ ।
बाह्रखरीलाई प्राप्त तत्कालीन समयको प्रहरी अनुसन्धानको निष्कर्षमा भनिएको छ, “चन्दको विभिन्न स्थानमा सम्पत्ति थियो । केहीमा विवाद पनि थियो । यी मुद्दाहरुमा करोडौंको नाफा घाटा हुने भएकाले यी मुद्दासँग सम्बन्धित व्यक्ति शंकाको घेरामा छन् ।”
कहाँ कहाँ थियो दिवाकरको सम्पत्ति विवाद ?
प्रहरी अनुसन्धानका क्रममा दिवाकर चन्दको नुवाकोटमा ३५६ रोपनी जमीन थियो ।
सो जग्गामा थानसेन कृषी फर्म थियो । अहिले जग्गाको अवस्थाबारे प्रहरीले चासो दिएको छ । तत्कालीन समयमा सो जग्गासँग सम्बन्धित अन्य व्यक्तिसँग प्रहरीले सोधपुछ गरेको थियो ।
प्रहरीका अनुसार मृतक दिवाकारको पुरानो राजदरबारको उत्तर ढोकामा रहेको ‘क्रस कन्ट्री होटेल’मा समेत विवाद रहेको खुलेको थियो ।
यसबाहेक महेन्द्रनगरमा रहेको महेन्द्रनगर मेडिकल कलेजको विषयमा समेत उनको मुद्दा रहेको बताइएको छ ।
महेन्द्रनगरमा मेडिकल कलेज बन्ने भनिए पनि बन्न भने सकेन । प्रहरीले कलेजसँग सम्बन्धित केही व्यक्तिसँग सोधपुछ समेत गरेको थियो ।
प्रहरीका अनुसार दिवाकर जग्गाको कारोबारसमेत गर्दै आएका थिए । प्रहरीले मृतक चन्दसँग जग्गाको कारोबार गर्नेसँगसमेत सामान्य सोधपुछ गरेको थियो ।
प्रहरी अधिकारीकाअनुसार फेरि मृतकसँग आर्थिक तथा जग्गा सम्बन्धी कारोबार भएकाहरुको पहिचान र उनीहरुविरुद्ध अनुसन्धान अगाडि बढाइएको छ ।
प्रहरीले जग्गा र आर्थिक पाटोकै विषयमा तत्कालीन समयमा चन्दसँग जग्गाको कारोबार गर्दै आएका टीकाराज तिम्सिनासँगसमेत बयान लिएको थियो ।
यसबाहेक ०६९ असोज १८ मा तत्कालीन सवाह नेपालका कार्यकारी अध्यक्ष रविन अमात्यलाई समेत सोधपुछ गरिएको थियो ।
प्रहरीले राजनीतिक र उच्च प्रशासनिक दबाबले तत्कालीन समयमा घटनाको अनुसन्धान रोक्नुपरेको बताउँदै आएको र यो घटनामा माओवादीका प्रभावशाली नेताहरुको समेत संलग्नता रहेको हुन सक्ने प्रहरी अनुमान छ ।
