वुटवल । लुम्बिनी प्रदेशको स्थायी राजधानी दाङमा सोमबार बसेको प्रदेश सभाको बैठकपछि सभामुख र उपसभामुख चयनको बाटो खुलेको छ । पहिलो बैठक बसेको मितिले १५ दिनभित्र सभामुख र उपसभामुख चयन गर्नुपर्ने संवैधानिक व्यवस्था छ ।

राजनीतिक दलबीच सहमतिको प्रयास गरिने र सम्भवतः आगामी बैठकले सभामुख चयन गर्ने प्रदेश सभा सचिवालयले जनाएको छ । प्रदेश सभाको आगामि बैठक माघ ३ गते बस्ने भएको छ ।

सोमबार बसेको लुम्बिनी प्रदेश सभाको दोस्रो बैठकले लुम्बिनी प्रदेश सभा नियमावली, २०७९ पारित गरेसँगै बैठक स्थगित भएको थियो । पहिलो अधिवेशनको दोस्रो बैठक सकिएपछि अध्यक्षता ग्रहण गरेका ज्येष्ठ सदस्य डिल्लीराज भुसालले तेस्रो बैठकको मिति तोकेका हुन् ।

यसअघि ज्येष्ठ सदस्य भुसालले ‘लुम्बिनी प्रदेश सभा नियमावली, २०७९’ पारित गरियोस् भनी प्रस्तुत गरेको प्रस्ताव सदनले पारित गरेको थियो ।

यही नियमावलीको आधारमा प्रदेश सभाले आफ्ना गतिविधि अघि बढाउनेछ । यसअघि प्रदेश नम्बर ५ नियमावली २०७४ थियो । तर, त्यो नियमावली ५० प्रतिशतभन्दा बढी संशोधन गर्नुपर्ने भएपछि नयाँ नियमावली बनाइएको प्रदेश सभा सचिव दुर्लभकुमार पुनले जानकारी दिए ।

"सिकाइ र अनुभवका आधारमा नियमावली संशोधन गर्नुपर्ने भयो । पुरानो नियमावली संशोधन गर्दा ५० प्रतिशतभन्दा बढी गर्नुपर्ने देखिएपछि नयाँ बनाइएको हो," पुनले भने, "प्रदेश सभाको सबै गतिविधि यही नियमावलीको आधारमा हुन्छ ।"