काठमाडौं । विश्व कुख्यात सिरियल किलरका रूपमा चिनिएका चार्ल्स शोभराज १९ वर्ष नेपालस्थित सुन्धारा केन्द्रीय कारागारमा सजाय काटेका विश्वकै ‘मोष्ट वान्टेड’ अपराधी हुन् ।

कतार एयसवेजको विमानबाट उनी स्वदेश फर्किन लागेका उनका वकिल गोपाल शिवाकोटी चिन्तनले जानकारी दिए । 

विमानस्थलमा पनि सुरक्षा तयारी बढाइएको छ । दूतावासबाट केही कागज नपुगेकाले उनी आजै जाने वा नजाने यसै भन्न नसकिने विमानस्थलस्थित अध्यागमनका अधिकारीहरु बताउँछन् ।

केन्द्रीय कारागार सुन्धारबाट छुटेलगत्तै अध्यागमन विभाग पुगेका शोभराजले आफू तत्कालै स्वदेश फर्किन चाहेको बताएका थिए ।

बुधबार सर्वोच्च अदालतले शोभराजलाई रिहा गर्न आदेश दिएको थियो । सर्वोच्चबाट फ्रान्सेली नागरिक शोभराजलाई जेलमुक्त गरेर १५ दिनभित्र आफ्नो देश फर्काउन आदेश दिएको थियो ।

बिहान कारागारबाट खाना खुवाएर शोभराजलाई अध्यागमन विभाग पु¥याइएको थियो । त्यहाँ रहँदा उनले चिया पिएका थिए ।

आफुले चाहेका व्यक्तिलाई मात्रै भित्र भेट्न बोलाए ।

यहाँसम्म कि उनले निहीता विश्वास र उनकी आमा शकुन्तला थापालाई भेट्न अस्वीकार गरे । निहीताको नाम शोभराजसँग जोडिँदै आएको थियो ।

पटक–पटक शोभराजलाई भेट्न खोज्दा पनि अध्यागमन कार्यालयमा प्रवेश नपाएपछि निहीता आक्रोशित देखिएकी थिइन् । 

दिनभर आमाछोरीले शोभराजसँग भेट्ने समय मागिरहे । तर उनीहरुको प्रयास सफल हुन सकेन् । भेट्न नपाए पनि उनले शोभराज सकुशल घर फर्किन पाउन् भनेर कामना गरिन् ।

निहीताकै अनुसार शोभराज केही दिन नेपालकै होटेल वा अस्पतालमा बस्न चाहन्थे । सुरक्षा स्रोतका अनुसार उनी थप १० दिन नेपालमै बस्न चाहन्थे तर कारागार बाहिर ।  

सुरक्षालगायत अन्य कारणले उनलाई नेपालमा राखिएन । एक ‘क्रुर अपराधी’ शोभराजको आगामी जीवन कस्तो होला भन्नेबारे चासो छ । 

शोभराजसँग जोडिएका कानुन व्यावसायी गोपाल सिवाकोटीका अनुसार उनी स्वदेश फर्किएपछि समाजसेवा गर्न इच्छुक देखिएका छन् ।

अध्यागमन परिसरका शोभराजको भनाइ उद्धृत गर्दै शिवाकोटीले  बाह्रखरीसँग भने, “मविरुद्ध लगाइएका आरोप, लेखिएका पुस्तक, बनाइएका भिडियो र सबै सामग्री झुटो हुन् । म मेराविरुद्ध गरिएका गलत कार्यको विरुद्ध क्षतिपूर्तिको माग गर्दै अन्तर्राष्ट्रिय न्यायिक निकायमा जान्छु । त्यहाँबाट आएको रकमले फ्रान्समै समाजसेवा गर्न चाहन्छु ।”

यसबाहेक फ्रान्स पुगेर परिवारका सदस्यलाई सबैभन्दा पहिले भेट्ने उनको योजना छ । शोभराजमाथि २० भन्दा बढी व्यक्तिको हत्या गरेको अभियोग छ । 

सन् २००३ मा उनलाई नेपाल प्रहरीले पक्राउ गरेको थियो । सन् १९७५ मा नेपाल आएका एक अमेरिकी र एक क्यानडेली नागरिकको हत्या अभियोगमा उनी पक्राउ परेका थिए । 

सन् २००४ मा अदालतले उनलाई आजीवन कारावासको सजाए सुनाएको थियो । त्यसपछि उनी ०६० सालमा काठमाडौंबाट पक्राउ परेका थिए । 

उनलाई सुन्धारास्थित केन्द्रीय कारागारको गोलघरमा राखिएको थियो ।