काठमाडौं । ‘विकिनी किलर’का नामले परिचित कुख्यात अन्तर्राष्ट्रिय अपराधी चार्ल्स शोभराजलाई थुनामुक्त गर्ने प्रक्रिया अगाडि बढाइएको छ । बुधबार (हिजो) सर्वोच्च अदालतले उनलाई जेलमुक्त गर्न आदेश दिएको हो ।

फ्रान्सेली नागरिक शोभराजलाई जेलमुक्त गरेर १५ दिनभित्र आफ्नो देश फर्काउन आदेश गरिएको छ । शोभराजका तर्फबाट कैद सजाय छुट पाउनुपर्ने भन्दै ०७५ कात्तिकमा सर्वोच्चमा निवेदन दिइएको थियो । लामो समयपछि सोही निवेदनका आधारमा सर्वाेच्चका न्यायाधीशद्वय सपना प्रधान मल्ल र तिलप्रसाद श्रेष्ठको इजलासले उनलाई जेलमुक्त गर्ने आदेश गरेको हो ।

शोभराजका तर्फबाट सर्वोच्चमा बहस गरेका अधिवक्ता गोपाल शिवाकोटी ‘चिन्तन’ले उनीविरुद्ध लागेका गलत आरोपको उनले छुटेपछि कानुनी प्रतिवाद गर्ने बताएका छन् । उनले शोभराजले परिवारका सदस्यलाई पनि भेट्ने र उनीहरू पनि नेपाल आउन सक्ने बताए । त्यसबाहेक के गर्ने भन्नेबारे छलफल भइरहेको शिवाकोटीको भनाइ छ ।

७८ वर्षीय शोभराजले १९ वर्ष कैद सजाय भोगिसकेका छन् । उनीमाथि २० भन्दा बढी व्यक्तिको हत्या गरेको अभियोग छ । उनीबाट भएका अधिकांश घटनामा महिला पीडित छन् ।

सन् २००३ मा उनलाई नेपाल प्रहरीले पक्राउ गरेको थियो । सन् १९७५ मा नेपाल आएका एक अमेरिकी र एक क्यानडेली नागरिकको हत्या अभियोगमा उनी पक्राउ परेका थिए । २००४ मा अदालतले उनलाई आजीवन कारावासको सजाए सुनाएको थियो ।

त्यसपछि उनी ०६० सालमा काठमाडौंबाट पक्राउ परेका थिए । उनलाई सुन्धारास्थित जगन्नाथदेवल कारागारको गोलघरमा राखिएको थियो ।

सर्वोच्चले आदेशको जानकारी जिल्ला अदालत काठमाडौं, भक्तपुर र केन्द्रीय कारागारमा पठाएको छ । आदेश प्राप्त गरेपछि जिल्ला अदालतले  अरू मुद्दामा सजाय भोग्न नपर्ने पाइए उक्त पत्राचारका आधारमा उनी छुट्नेछन् । छुटेमा उनी आफ्नो मुलुक फ्रान्स जान पाउनेछन् ।

शोभराजलाई कसको जिम्मा लगाउने र छुटाउने प्रक्रियाबारे कारागार व्यवस्थापन विभागका अधिकारीहरू छलफलमा छन् । उनलाई नेपालस्थित फ्रान्सेली दूतावास वा अध्यागमन विभागको जिम्मा लगाइने सम्भावना बढी छ ।

छुटेपछि के गर्लान् शोभराज ?
कारागारबाट छुटेको अवस्थामा शोभराजले के गर्लान् भन्ने चासो बढ्दो छ । उनले कारागारभित्र आफूसँग नजिक रहेका कैदीहरूलाई आफ्नी छोरी भेट्ने इच्छा रहेको बताउँदै आएका थिए ।

उनले जापानी महिलासँग आफूले विवाह गरेको र उनीबाट एक छोरी जन्मिएको बताउने गरेका थिए । उनले आफू नेपालमा पक्राउ पर्दा छोरी ६ महिनाकी भएको सुनाउँदै आएका थिए । उनको त्यो रहर पूरा हुने/नहुने टुंगो छैन ।

पछिल्लो समय शोभराजमा स्वास्थ्य समस्या समेत देखिएको थियो । सर्वोच्चको पछिल्लो आदेशसँगै उनी रहेको सुन्धारा कारागारको सुरक्षा व्यवस्था कडा पारिएको छ ।