बुटवल । लुम्बिनी प्रदेशमा संसदीय दलको नेता बन्नका लागि नेताहरूले आन्तरिक तयारी थालेका छन् । निर्वाचनको नतिजा आइसकेपछि ठूला दलका प्रदेशसभा सदस्यहरू मुख्यमन्त्रीको आसमा दलको नेता बन्न तम्सिएका हुन् । संसदीय दलको नेता बने मुख्यमन्त्री बन्ने सम्भावना हुने भएकाले उनीहरूको दौडधुप सुरु भएको हो ।

लुम्बिनीमा नेपाली कांग्रेस, नेकपा (एमाले) र नेकपा (माओवादी केन्द्र)का दलका नेता मुख्यमन्त्री पदको बलिया दाबेदार हुनेछन् । सोही कारण दलको नेता बन्न आकांक्षीहरूले आफ्ना पार्टीका केन्द्रीय नेताहरूसँग ‘लबिङ’ गरिरहेका छन् ।

कतिपय नेताले पार्टीभित्र ‘वरिष्ठ’ भएकाले दलको नेता बन्ने जिकिर गरेका छन् । केहीले संसदीय अनुभव र मन्त्री भएका आधारमा भावी मुख्यमन्त्रीको आकांक्षा राखेका छन् । केही प्रदेशसभा सदस्यले काठमाडौंमै पुगेर केन्द्रीय नेताहरूसँग भेटघाट समेत गरेका छन् ।

अहिलेकै सत्ता गठबन्धन कायम रहेमा कांग्रेसले मुख्यमन्त्री पाउन सक्ने सम्भावना धेरै छ । कांग्रेसमा लुम्बिनी प्रदेशसभा सदस्यमा विजयी भएका मध्ये अब्दुल रज्जाक, डिल्ली चौधरी, वीरबहादुर राना र राजु खनालले संसदीय दलको नेताका लागि दौडधुप गरिरहेका छन् ।

अहिले रुपन्देही क्षेत्र नम्बर–१ ‘ख’बाट प्रदेश सांसद बनेका रज्जाक ०७० सालमा संविधानसभा सदस्य र केही समय राज्यमन्त्री समेत भएका थिए । सुरुदेखि नै सभापति शेरबहादर देउवा समूहका उनी केन्द्रीय सदस्य समेत हुन् । प्रदेशसभा सदस्यमध्ये पार्टी वरीयतामा माथि रहेकाले दलको नेतामा उनको चर्चा हुँदै आएको छ ।

दाङ–३ ‘क’बाट निर्वाचित चौधरी र दाङ–२ ‘ख’बाट विजयी खनाल पनि संसदीय दलको नेता बन्नका लागि दौडधुपमा छन् । चौधरी ०७० मा संविधानसभा सदस्यका साथै राज्यमन्त्री भएका थिए । उनी ०७४ सालमा पनि सोही क्षेत्रबाट प्रदेशसभामा निर्वाचित भएका थिए । अहिले सहरी विकास तथा पर्यटनमन्त्रीको जिम्मेवारीमा छन् । देउवासँग निकट चौधरी मुख्यमन्त्रीका आकांक्षी हुन् ।

खनाल हाल कांग्रेसको लुम्बिनी प्रदेश उपसभापति हुन् । उनीसँग संविधानसभा सदस्यका रूपमा समेत काम गरेको अनुभव छ । उनले आफ्नो दाबी स्वाभाविक रहेको बताएका छन् ।

लुम्बिनीमा कांग्रेसका २७ प्रदेश सांसद छन् । तीमध्ये १७ प्रत्यक्ष र १० समानुपातिकतर्फका हुन् ।

लुम्बिनीको सबैभन्दा ठूलो दल एमालेभित्र पनि संसदीय दलको नेता बन्नका लागि दौडधुप बढेको छ । रुपन्देही–२ ‘क’बाट प्रदेश सांसद निर्वाचित लीला गिरी त्यसमध्ये अग्रपंक्तिमा देखिएका छन् ।

यस्तै, रुपन्देही–२ ‘ख’बाट निर्वाचित भोजप्रसाद श्रेष्ठ, यसअघि प्रदेशसभामा प्रमुख सचेतक रहेका रुपन्देही–५ ‘क’बाट निर्वाचित भूमिश्वर ढकाल पनि संसदीय दलको नेताका लागि लबिङमा लागेका छन् ।

एमाले पोलिटब्युरो सदस्य समेत रहेका गिरीले आफू वरिष्ठ भएकाले संसदीय दलको नेतामा स्वाभाविक दाबी भएको बताएका छन् । उनी यसअघि प्रदेशको मन्त्री समेत भएका थिए ।

प्रदेशका अर्का पूर्वमन्त्री एवं एमाले प्रदेश उपाध्यक्ष श्रेष्ठले पनि दलको नेतामा आफ्नो दाबी रहेको बताए । पार्टीको आवश्यकता र कामको मूल्यांकनको हिसाबले आफूले संसदीय दलको जिम्मेवारी पाउनुपर्ने उनको जिकिर छ ।

यसअघिका प्रमुख सचेतक ढकाल पनि संसदीय दलको दौडधुपमा छन् ।

प्रत्यक्ष र समानुपातिकतर्फ गरी २९ सिट जितेर लुम्बिनी प्रदेशसभामा एमाले पहिलो दल बनेको छ ।

माओवादी केन्द्रमा भने जोगबहादुर महरा संसदीय दलको नेता बन्ने निश्चितजस्तै छ । रोल्पा ‘क’बाट निर्वाचित उनी माओवादी केन्द्रका अध्यक्ष पुष्पकमल दाहाल ‘प्रचण्ड’को सचिवालयमा समेत बसेर काम गरेका नेता हुन् । मुख्यमन्त्री बन्ने लक्ष्यसहित गुल्मीबाट चुनाव लडेका माओवादी केन्द्रका प्रदेश अध्यक्ष सुदर्शन बराल पराजित भएपछि संसदीय दलको नेताका लागि महरा निर्विकल्पजस्तै देखिन्छ ।

लुम्बिनीमा माओवादी केन्द्रका महरासहित पाँचजनाले प्रत्यक्ष निर्वाचन जितेका छन् । समानुपातिकबाट चारजना आएका छन् ।

लुम्बिनीमा अहिलेकै सत्ता गठबन्धनको सरकार बनेमा कांग्रेस र माओवादी केन्द्रबीच कसले नेतृत्व गर्ने भन्ने रस्साकस्सी चल्नेछ । यहाँ साना दलका नेताहरू भने संसदीय दलको नेताभन्दा पनि कुन दललाई समर्थन गर्दा सत्तामा जान सकिन्छ भन्नेमा केन्द्रित देखिन्छन् । अघिल्लोपटक पाँच दल रहेकोे लुम्बिनी प्रदेशसभामा अहिले १० दल छन् ।