बुटवल । मंसिर ४- प्रतिनिधि र प्रदेशसभा सदस्य निर्वाचनको दिन । पाँच निर्वाचन क्षेत्र रहेको रुपन्देहीका सबै क्षेत्रका केही निर्वाचन स्थल पुग्दा केही नाैला र राेचन दृष्यहरू देखिए । 

रुपन्देहीका सबैजसो निर्वाचन क्षेत्रका मतदान केन्द्रहरूमा अघिल्ला निर्वाचनमा जस्तो उत्साह र जाँगर देखिएन ।  आफ्नो मतको सदुपयोग गर्न केही व्यक्तिहरू कष्टकर तरिकाले आएको पाइएपनि रुपन्देहीमा जम्मा ६७ प्रतिशत मात्रै मत खसेको छ । सहरी क्षेत्र रहेको रुपन्देही बाहेकका अन्य क्षेत्रमा मतदाताहरू दुखसुख मतदानस्थल पुगेका थिए ।

क्षेत्र नम्बर १ मा पर्ने देवदह १२ को प्रगति माविमा रहेको मतदान स्थलमा पुग्दा सुनसान थियाे । यहाँ अघिल्लो निर्वाचनमा विवाद भएकोले देवदह वडा नम्बर ११ का मतदाताले यहाँ मतदान गरेका थिए । 

मधेसी मुलका बाहुल्य रहेकाे क्षेत्र भएकोले मेलाकै रूपमा निर्वाचनलाई लिने गरेको पाइयो । त्यहाँ खाजाका स्टल तथा ठेलाहरूमा निकै चहलपहल थियो।

लगत्तै क्षेत्र नम्बर १ कै राम नरेश यादव आदर्श उमाविमा रहेको मतदान केन्द्रमा पुग्दा अघिल्लो स्थानको तुलनामा केही बढी चहलपहल देखिएको थियो । यहाँ मतदाता आउने र जाने क्रम रहेकोले धेरै संख्यामा मतदाता देख्न भने पाइएन ।

क्षेत्र नम्बर २ अन्तर्गत सडक भिडिजनभित्र रहेको मतदान केन्द्रमा चार उमेदवारले मतदान गरेपनि खासै चहलपहल देखिएको थिएन । मतदान केन्द्रको प्रवेशद्वारमा केही नेता कार्यकर्ताहरू देखिएपनि जनताहरूमा उत्साह देखिएन । 

क्षेत्र नम्बर ३ को लिलाराम माविमा पनि उत्साह देखिएन । यद्यपि, त्यहाँ नयाँदलप्रति मतदाताकाे आकर्षण देखियाे । 

क्षेत्र नम्बर ४ को मर्चवारीको मर्चवार आदर्श माविमा पुग्दा प्रतिनिधिसभा सदस्य उमेदवार प्रमोद यादव त्यही थिए ।भिडभाड रहेको त्यहाँकाे वातावरण भने उत्साहजनक देखिन्थ्याे ।

त्यहाँ अपांग श्रीमतीलाई साईकलमा डोर्याएर ल्याएको दृष्य पनि देख्न सकिन्थ्यो । मुस्लीम समुदायका महिलाहरू बुर्खा लगाएर पुगेका थिए। बुढापाकाहरू निर्वाचन पछिका मतपरिणामको आँकलनको बारेमा छलफलहरू सुन्न सकिन्थ्यो।

क्षेत्र नम्बर ५ को पर्सा मतदान केन्द्रमा पुग्दा दृष्य फरक थियो । त्यहाँ शान्त रूपमा मतदान भइरहेको थियो । करिब ३ बजेतिर त्यहाँ पुग्दा मुस्लिम समुदायका महिला बुर्का लगाएर र अन्य समुदायका व्यक्तिहरू मिलेर लाइनमा बसेको देख्न सकिन्थ्यो । यसका साथै दृष्टिविहीन, अपांग तथा बृद्धबृद्धाहरू भने सहयोगीका साथमा पुगेका थिए ।

सबै क्षेत्रका मतदाताहरूका भनाइ सुन्दा पुराना उमेदवारहरू र पुरानै एजेन्डा बोकेका नेताहरूलाई मतदान गर्दा वाक्क भएको प्रतिक्रिया दिइरहेका थिए । उनीहरूले आफ्ना समस्यालाई चुनावी नाराको रूपमा मात्रै प्रयोग गर्ने र विजयी भएपनि वास्ता नगर्ने परम्परा देखिएको बताएका थिए ।