काठमाडौं । कोभिड–१९ का कारण सुस्ताएको होटेल व्यवसाय पुरानो अवस्थामा फर्कन थालेको छ ।

नेपाल स्टक एन्सचेन्ज (नेप्से)मा तीन पाँचतारे होटेल सूचीकृत छन् । ओरियन्टल होटेल्स लिमिटेड (र्‍याडिसन), तारागाउँ रिजेन्सी होटेल्स (हायात) र सोल्टी होटेल्स लिमिटेड नेप्सेमा सूचीकृत छन् । ती होटेलले प्रकाशित गरेको पहिलो त्रैमासको वित्तीय विवरणमा व्यापार बढेको देखिएको छ ।

र्‍याडिसनको वित्तीय विवरणानुसार सो होटेलले चालु आर्थिक वर्षको पहिलो त्रैमासमा १९ करोड ६९ लाख ८४ हजार ६१८ रुपैयाँको व्यापार गरेको छ । गत आर्थिक वर्षको सोही अवधिमा होटलले तीन करोेड ६५ लाख तीन हजार ६४० रुपैयाँको व्यापार गरेको थियो ।

हायात होटेलको व्यापार पनि गत वर्षको भन्दा सुध्रिएको छ । हायातले गत आर्थिक वर्षको पहिलो त्रैमासमा पाँच करोड ३५ लाख ११ हजार ३१६ को व्यापार गरेको थियो । यो अवधिमा अहिले १८ करोड १५ लाख ५१ हजार ७२९ रुपैयाँको व्यापार गरेको देखिएको छ ।

यस्तै, नेप्सेमा सूचीकृत अर्काे सोल्टी होटेलको व्यापारमा समेत उल्लेख्य सुधार देखिएको छ । यो होटेलले अघिल्लो आर्थिक वर्षको पहिलो त्रैमासमा १२ करोडको व्यापार गरेकोको थियो । चालु आर्थिक वर्षमा ४१ करोडको व्यापार गरिसकेको छ ।

पाँचतारे होटेलमा विभन्न एनजीओ, आईएनजीओले सभा, सेमिनार समेत गर्ने भएकाले व्यापार बढेको होटेल एसोसिएसन अफ नेपालका वरिष्ठ उपाध्यक्ष विनायक शाह बताउँछन् ।

“विभिन्न एनजीओ, आईएनजीओ पदाधिकारी बस्ने पाँचतारे होटेलमा हो । अन्य संस्थाहरूको पनि सभा, सम्मेलन, व्यक्तिगत विवाह, व्रतबन्ध, बैठकहरू पनि ठूला होटेलमा हुन्छ । त्यसले व्यापार राम्रो भएको हो,” उनले भने ।

अहिले होटेलको व्यापारमा रौनक छाएको शाहले बताए । विदेशी पर्यटक पनि विस्तारै नेपाल आउन थालेपछि व्यापार सुध्रिएको उनको भनाइ छ ।

कुन होटेलको नाफा कति ?
र्‍याडिसन होटेलले चालु आर्थिक वर्षको पहिलो त्रैमासमा एक करोड ११ लाख ९६ हजार १८५ रुपैयाँ नाफा गरेको छ । र्‍याडिसन गत वर्ष पहिलो त्रैमासमा पाँच करोड ६३ लाख घाटामा थियो । यो वर्ष सोही अवधिमा र्‍याडिसनको नाफा दोब्बरले बढेको छ ।

यस्तै, हायात होटेलले पनि पहिलो त्रैमासमा दुई करोड ४६ लाख ७१ हजार ७०७ रुपैयाँ नाफा गरेको छ । गत आर्थिक वर्षको सोही अवधिमा चार करोड ५५ लाख ४१ हजार २३९ रुपैयाँ घाटामा थियो ।

सोल्टी होटेलले चालु आर्थिक वर्षको पहिलो त्रैमासमा ११ करोड २० लाख ६ हजार ४४५ रुपैयाँ नाफा गरेको छ । सोही अवधिमा गत वर्ष दुई करोड ११ लाख ६६ हजार २३६ रुपैयाँमा घाटामा थियो ।