![रुसी अधिकारीसहित हजारौँ सर्वसाधारणले युक्रेनी सहर छाेड्न थाले](https://12khari.top/uploads/posts/1------- russian evacuting from ukrane1666183617.jpg)
किभ । युक्रेनको दक्षिणी खेर्सोन क्षेत्रमा युक्रेनी फौजबाट प्रत्याक्रमण गर्न लागेको भन्दै त्यहाँका हजारौँ सर्वसाधारण र रुसद्वारा नियुक्त गरिएका अधिकारीहरूलाई अन्यत्र सुरक्षित गन्तव्यतर्फ लगिएको छ ।
रुसद्वारा नियुक्त स्थानीय नेताले यसबारे जानकारी दिएका हुन् ।
नेता भ्लादिमिर साल्दोले निएपर नदीको पश्चिम किनारमा रहेका चारवटा सहरका ५० देखि ६० हजार सर्वसाधारणले विस्तारै संगठित रूपमा घर छाड्ने जानकारी दिएका छन् । खेर्सोन सहरका सम्पूर्ण विभागमा रुसबाट नियुक्त गरिएका अधिकारीहरूले पनि नदी पार गर्ने बताइएको छ ।
रुसी टेलिभिजन फुटेजमा थुप्रै मानिस निएपर नदी नजिक जम्मा भएको देखिन्छ । उनीहरू डुंगाको पखाईमा लामबद्ध बसेका छन् ।
![Global Ime bank](https://baahrakhari.com/uploads/bigyaapan/30885600.gif)
भूमि कब्जा गर्ने शक्तिले अधिनस्थ क्षेत्रका सर्वसाधारणलाई अन्यत्र पठाउनुलाई युद्ध अपराध मानिन्छ । युक्रेनी राष्ट्रिपतिका सल्लाहकार मिखाइलो पादोल्याकले रुसले खेर्सोन कब्जा गरेर खुसीयाली मनाएको एक महिना पनि नभएको बताएका छन् ।
सोमबार राति युक्रेनस्थित रुसका नयाँ सैनिक कमान्डर जनरल सर्गेइ सुरोभिकिनले क्षेत्रीय राजधानी खेर्सोन सहरको स्थिति जटिल रहेको बताएका थिए ।
त्यसैगरी रुसद्वारा नियुक्त अधिकारी किरिल स्ट्रमोउसोभले युक्रेनी फौजले निकट भविष्यमा नै खेर्सोनमा आक्रमण गर्न लागेको चेतावनी त्यहाँका बासिन्दालाई दिएका छन् ।
बीबीसीबाट ।