काठमाडौं । आसन्न प्रतिनिधिसभा तथा प्रदेशसभा सदस्य निर्वाचनमा पहिलो हुने निर्वाचित हुने निर्वाचन प्रणालीतर्फ समावेशी समूहमा खस आर्य समूहका उमेदवारको बाहुल्य देखिएको छ ।

प्रतिनिधिसभातर्फ कुल दुई हजार ४१२ उमेदवारमध्ये खस आर्य समूहमा सबैभन्दा बढी एक हजार १७ जनाको उमेदवारी कायम भएको निर्वाचन आयोगको तथ्यांक छ ।

आदिवासी जनजाति समूहमा ६४१, मधेसी समूहतर्फ ५०६, दलिततर्फ ९७, मुस्लिमतर्फ ८२ र थारु समूहतर्फ ६९ जनाको उमेदवारी कायम भएको छ ।

प्रदेशसभातर्फ पनि खसआर्य समूहका उमेदवार बढी देखिएका छन् । खसआर्यतर्फ एक हजार ५५ जनाको उमेदवारी कायम भएको छ । प्रदेशसभा सदस्य निर्वाचनका लागि तीन हजार २२४ जनाको उमेदवारी दर्ता भएको छ ।

प्रदेशसभातर्फ ९०६ आदिवासी जनजाति, ८७४ मधेसी, १४५ मुस्लिम, १४४ दलित र १०० जना थारु समूहतर्फ उमेदवारी कायम भएको छ ।

आउँदो मंसिर ४ गते हुने प्रतिनिधिसभा र प्रदेशसभा सदस्य निर्वाचनका लागि यही असोज २३ गते देशभर उमेदवारको मनोनयनपत्र दर्ता गरिएको थियो । रासस