डडेलधुरा । स्थानीय तह निर्वाचनको सम्मुखमा गएको वैशाख २७ गते कर्ण मल्लले डडेलधुराका मतदाता किन्न करोडौँ रुपैयाँ ल्याइएको दाबी गरे । सो समयमा उनी नेपाली कांग्रेसबाट निष्कासित भएर नेपाली कांग्रेस (बीपी)मार्फत चुनावी अभियान सञ्चालन गरिरहेका थिए ।

“यहाँका मतदातालाई पैसामा किन्नका लागि वाग्मती अञ्चलको गाडीमा करोडौँ रुपैयाँ ल्याइएको छ,” गाडी नम्बर नै उल्लेख गरेर उनले भनेका थिए ।

वैशाख ३० मा भएको स्थानीय निर्वाचनमा कांग्रेस डडेलधुराका सातमध्ये पाँच तहमा विजयी भयो । नेकपा (माओवादी केन्द्र)ले दुई तह जित्यो । मल्लले नेतृत्व गरेको कांग्रेस (बीपी)ले कुनै पालिका जित्न सकेन ।

निर्वाचनमा पराजित भएपछि पनि उनले करोडौँमा मतदाता किनेर कांग्रेस विजयी भएको आरोप लगाए ।

कांग्रेस (बीपी)का वरिष्ठ उपसभापति मल्लले आफ्नो भाषणमा नछुटाउने अर्को वाक्य ‘डडेलधुराका देवतुल्य मतदाता’ पनि हो ।

शनिबार जिल्ला सदरमुकाममा आयोजित पत्रकार सम्मेलनमा पनि डडेलधुराबाट प्रतिनिधिसभातर्फ उमेदवार बनेका मल्लले उक्त वाक्य छुटाएनन् । “यसपटक परिवर्तनका लागि डडेलधुराका देवतुल्य मतदाताले साथ दिनेमा विश्वस्त छु,” उनले भने ।

उनले पटक–पटक डडेल्धुराका मतदाता देवतुल्य रहेको बताएका छन् । त्योभन्दा बढीपटक पैसामा बिकेर भोट दिएको भाषण गरेका छन् ।

डडेलधुराका मतदाता देवतुल्य कि पैसामा बिक्ने भन्ने जिज्ञासामा उनले भने, ‘मेरो भावबाट देवतुल्य हुन् । तर, पैसा बाँड्ने व्यक्तिविरुद्ध सचेतना जगाउन भने आवश्यक छ । सोही कर्तव्यअन्तर्गत पनि हाम्रो उमेदवारी हो ।”

पत्रकार सम्मेलनमा अधिकांश समय उनी प्रधानमन्त्री समेत रहेका कांग्रेस सभापति शेरबहादुर देउवामाथि खनिएका थिए । उनको उमेदवारी देउवाविरुद्ध नै हो ।

“६ पटक निर्वाचित गरेर पनि आश्वासनबाहेक केही पनि पाइएको छैन,” उनले भने, “सातौँपटक मत नदिएर स–सम्मान बिदाइ गर्न आवश्यक छ ।”

तालमेल
प्रदेशसभातर्फ डडेलधुरा ‘ख’का स्वतन्त्र उमेदवार डा. तारा जोशी र कांग्रेस (बीपी)बीच चुनावी तालमेल हुने भएको छ । प्रतिनिधिसभातर्फ मल्ल र प्रदेशसभातर्फ जोशीलाई समर्थन गर्ने गरी तालमेलको निर्णय गरिएको हो ।

उक्त तालमेलमा सत्ता गठबन्धनमा आबद्ध दल नेकपा (एकीकृत समाजवादी)ले पनि समर्थन गरेको उक्त पार्टीका जिल्ला अध्यक्ष कविन्द्र बिष्टले जानकारी दिए । एकीकृत समाजवादीले पनि प्रतिनिधिसभातर्फ मल्ल र प्रदेशसभातर्फ ‘ख’मा जोशीलाई समर्थन गर्ने जनाइएको हो ।

स्वतन्त्र उमेदवारी दिएका जोशी एकीकृत समाजवादीकै नेता हुन् । सत्ता गठबन्धनबाट टिकट नपाएपछि उनी स्वतन्त्र उमेदवार बनेका हुन् ।

डडेलधुरामा प्रतिनिधिसभातर्फ प्रधानमन्त्री देउवासहित आठ र प्रदेशसभातर्फ १२ उमेदवार चुनावी मैदानमा छन् ।