काठमाडौं । आठ दिनदेखि आमरण अनसनमा रहेका डा. गोविन्द केसीको स्वास्थ्य अवस्था नाजुक भएपछि सेती प्रादेशिक अस्पतालले अन्यत्र रिफर गर्न सुझाव दिएको छ । अनसनको आठौँ दिनमा आइपुग्दा डा. कसीलाई श्वासप्रश्वासमा कठिनाइ हुने, प्रेसर तलमाथि हुने, दिसामा रगत हुनेजस्ता समस्या देखिएपछि अस्पतालले रिफरको सुझाव दिएको हो ।

“उहाँको अवस्था जटिल छ, जुनसुकै बेला जेसुकै पनि हुनसक्ने देखिएको छ, दिसामा समस्या भएकाले अलसर हो की भन्ने संकेत देखिन्छ । हामीले विशिष्टीकृत अलि धेरै विशेषज्ञहरू भएको अस्पतालमा लैजान सुझाव दिएका हौँ”, डा. केसीको उपचारमा संलग्न सेती प्रादेसशक अस्पतालका फिजिसियन डा. शेरबहादुर कमरले बाह्रखरीसँग भने । 

डा. केसीको अवस्था नाजुक भएकाले केही जटिलता भइहाले सेतीमा बचाउन जोखिम हुने डा. कमरको भनाइ छ । सात बुँदे माग राख्दै धनगढीस्थित सेती प्रादेशिक अस्पतालमा अनसनरत डा. केसी पक्ष र सरकार पक्षबीच वार्ता जारी छ । प्रधानमन्त्री तथा मन्त्रिपरिषद्को कार्यालयमा आइतबार भएको द्धीपक्षीय वार्ता निष्कर्सविहीन भएको थियो ।  आज १ बजेलाई तय गरिएको वार्ता शिक्षा सचिव रामकृष्ण सुवेदीको समय नमिलेका कारण अनौपचारिक छलफलमा मात्रै सीमित भएको डा. केसीका प्रेस संयोजक प्रितम सुवेदीले बताए ।