काठमाडौं । नेपाली राष्ट्रिय क्रिकेट टोलीका कप्तान सन्दीप लामिछानेले आफूविरुद्ध बलात्कारको आरोप लागेपछि कानुनी उपचारमा सहयोग गरिदिन नेपाली क्रिकेट संघ (क्यान)सँग आग्रह गरेका छन् ।

एक १७ वर्षीया किशोरीले सन्दीपले जबर्जस्ती करणी गरेको भन्दै प्रहरीमा जाहेरी दिएपछि उनले कानुनी उपचारका लागि सहयोग गरिदिन आग्रह गरेका हुन् । हाल क्यारेबियन लिग क्रिकेटका लागि वेस्ट इन्डिजमा रहेका लामिछानेले क्यानसँगको फोनवार्तामा आफूले जबर्जस्ती करणी नगरेको दाबी गर्दै कानुनी उपचारका लागि सहयोग गरिदिन आग्रह गरेको क्यानका सचिव प्रशान्त मल्लले बताए ।

उनले क्रिकेटर लामिछानेसँग कुरा भइसकेको र प्रिमियर लिगका खेल सकिएपछि स्वदेश फर्कने बताएको पनि जानकारी दिए ।

फोनवार्तामा क्रिकेटर लामिछानेले कानुनी उपचारका लागि ‘प्रोफाइलिस्ट लयर’ खोजिदिन आग्रह गरेको उनले बताए । उनले यसबारेमा आईसीसीले पनि चासो दिएको उल्लेख गरे । आईसीसीलाई पनि यसबारेमा जानकारी गराइएको उनले बताए ।

“हिजो राति क्यानले नै सम्पर्क गर्‍यो । मैले नै सम्पर्क गरेँ । रेप केसमा एकजना युवतीले जाहेरी दिएको छ, तिमीलाई थाहा छ भन्दा मैले थाहा पाएको छु भन्यो । यसमा तिम्रो भनाइ के हो भन्दा मेरो त्यसमा कुनै संलग्नता छैन भन्ने किसिमको कुरा गर्‍यो । क्यानले सहयोग गर्नुपर्‍यो, कानुनी उपचारमा प्रोफाइलिस्ट लयर हायर गर्नुपर्छ भन्यो । म सीपीएल म्याच सकेर फर्किन्छु भन्यो । टिमले थाहा पाएको छ, तर खेल्नलाई समस्या छैन भन्यो,” सचिव मल्लले भने, “प्रहरीले हामीसँग सहयोग मागेको छैन । आईसीसीले चासो राखेको छ, मैले सबै ब्रिफ गरिसकेको छु । आईसीसीले के हुन सक्छ भन्यो । मैले केस लागेपछि त्यहीअनुसार, कानुनअनुसार दर्ता हुन्छ भन्यौँ । यसमा आईसीसी गम्भीर बनेको छ । मुद्दा परेको छ, पुलिसले आफ्नो अनुसन्धान गरिरहेको छ ।”

क्यानका तर्फबाट सचिव मल्लले क्रिकेटर लामिछानेसित बुधबार राति घटनाका बारेमा जानकारी लिएका थिए । त्यतिखेर सन्दीपले उक्त घटनामा आफ्नो कुनै संलग्नता नरहेको उल्लेख गरेका क्यानले जनाएको छ । एजेन्सी/एनएएन