काठमाडौं । खेलकुदमन्त्री महेश्वरजंग गहतराजले खेल क्षेत्रको विकासका लागि सरकार प्रतिवद्ध रहेको बताएका छन् । 

बुधबार काठमाडौंमा नेपाल भलिबल संघको नवौँ चुनावी साधारणसभा उद्घाटन गर्दै मन्त्री गहतराजले खेल क्षेत्रलाई विद्यालय तहबाट नै विकास गर्नका लागि सरकार प्रतिवद्ध रहेको बताए । 

उनले एक विद्यालय एक पूर्वाधार सरकारको प्राथमिकतामा रहेको र एक पालिका एक खेल ग्रामको कार्यक्रमलाई प्रभावकारी रुपमा अघि बढाउने जानकारी दिए । त्यस्तै, सातवटै प्रदेशमा अन्तर्राष्ट्रिय स्तरका पूर्वाधार बनाउने योजना सरकारको रहेको बताए । 

मन्त्री गहतराजले अन्तर्राष्ट्रिय खेलमा पदक विजेता खेलाडीलाई प्रोत्साहन स्वरुप पुरस्कार दिने कामलाई वर्तमान सरकारले दीर्घकालीन रुप दिएको दाबी गरे । भलिबल खेलको विकासका लागि पनि एकतावद्ध भएर काम गर्न उनले संघलाई सुझाव दिए । 

कार्यक्रममा राष्ट्रिय खेलकुद परिषद्का सदस्य सचिव टंकलाल घिसिङले भलिबलको ठूला अन्तर्राष्ट्रिय प्रतियोगिताका लागि छुट्टै कभर्ड हल बनाउनका लागि विभिन्न तीन स्थानको अध्ययन भइरहेको जानकारी दिए । 

संघको चुनावी साधारण सभाले चार वर्षका लागि नयाँ नेतृत्वसमेत चयन गर्नेछ । नयाँ नेतृत्वका लागि वर्तमान उपाध्यक्ष निरोज मास्के र महासचिव जितेन्द्र चन्द चुनावी प्रतिस्पर्धामा उत्रिएका छन् । संघको केन्द्रीय निर्वाचनमा १३१ जना मतदाता रहेका छन् ।