काठमाडौं । नेपालले आज तुलनात्मक रूपमा कमजोर मानिएको भुटानविरुद्ध खेल्दै साफ महिला च्याम्पियनसिपको सुरुआत गर्दैछ । नेपालका मुख्य प्रशिक्षक कुमार थापाले भुटान भने भुटानलाई कमजोर नआक्ने बताएका छन् । 

थापाले दोस्रोपटक महिला टोलीको प्रशिक्षण सम्हालेका हुन् । थापाको पहिलो प्रशिक्षण कालमा नेपालको यात्रा सेमिफाइनलमै टुंगिएको थियो । २०१६ मा नेपाल सेमिफाइनलमा भारतसँग पराजित भएको थियो । थापाले यो दोस्रो अवसरलाई खेर जान नदिने बताएका छन् । 

महिला साफमा नेपाल र भुटान तीनपटक आमनेसामने भएका छन् । पाकिस्तानमा सम्पन्न २०१४ र भारतमा सम्पन्न २०१६ को संस्करणमा नेपालले भुटानलाई समान ८–० ले हराएको थियो । नेपालमै सम्पन्न २०१९ को संस्करणमा भने नेपाल ३–० ले विजयी भएको थियो । त्यसमध्ये सावित्रा भण्डारीले मात्रै ८ गोल गरेकी छन् । 

उनै सावित्राले आज पनि नेपालको अग्रपंक्ति सम्हाल्नेछिन् । सावित्रालाई आज अनिता केसी र अमिषा कार्कीले साथ दिने सम्भावना छ । त्यसो भएमा अमिषाले आज डेब्यु गर्नेछिन् । 

नेपालको गोलपोस्ट कप्तान एन्जिला तुम्बाप्पो सुब्बाले सम्हाल्नेछिन् । एन्जिलाले पनि कप्तानका रुपमा डेब्यु गर्नेछिन् । नियमित कप्तान रेनुका नगरकोटी घाइते पछि कप्तानीको जिम्मेवारी एन्जिलाको काँधमा आएको हो । 

मध्यपंक्तिमा अनुभवी अनिता बस्नेतलाई सरु लिम्बु र दीपा शाहीले साथ दिने सम्भावना छ । त्यसो भएमा दीपा शाहीले पनि डेब्यु गर्नेछिन् । रक्षापंक्तिमा पुनम जर्घामगर, अमृता जैशी, हिराकुमारी भुजेल र गिता रानाको सम्भावना छ । 

नेपालको सम्भावित टिम

गोलकिपर : एन्जिला तुम्बाप्पो सुब्बा (कप्तान)

रक्षक : पुनम जर्घामगर, अमृता जैशी, हिराकुमारी भुजेल, गिता राना 

मिडफिल्डर : अनिता बस्नेत, सरु लिम्बु, दीपा शाही, 

फरवार्ड : अमिषा कार्की, सावित्रा भण्डारी, अनिता केसी