काठमाडौं । चार वर्षको अन्तरालपछि एसिया कप युनाइटेड अरब इमिरेट्स (यूएई)मा शुक्रबारदेखि हुँदैछ । बुधबार राति हङकङले यूएईलाई आठ विकेटले हराउँदै प्रतियोगितामा स्थान पक्का गरेपछि एसिया कप खेल्ने ६ टिमको पनि टुंगो लागेको हो । 

यससँगै एसियाका उत्कृष्ट टिम भारत, पाकिस्तान, श्रीलंका, बंगलादेश, अफगानिस्तान, र हङकङले भदौ ११ गतेदेखि २६ गतेसम्म प्रतिस्पर्धा एसिया कपमा गर्दैछन् । टी-२० स्वरुपमा खेलाइने प्रतियोगितामा सहभागी ६ टोलीलाई दुई समूहमा विभाजन गरिएको छ । समूह ‘ए’मा हङकङ, भारत र पाकिस्तान छन् । समूह ‘बी’मा श्रीलंका, बंगलादेश र अफगानिस्तान छन् । 

दुई समूहका विजेता र उपविजेताले सुपर-४ मा स्थान बनाउनेछन् । सुपर-४ मा चार टिमले राउण्ड रोविन लिगअनुसार प्रतिस्पर्धा गर्नेछन् । सुपर-४ को शीर्ष दुई टोलीले फाइनलमा उपाधिका लागि भिड्नेछन् । 

सहभागी टिमबारे विस्तृतमा: 

भारत 
भारत यस प्रतियोगिताको सदाबहार उपाधि दाबेदार हो । साथै, भारत साविक विजेता टोली पनि हो । भारतले २०१८ मा यूएईमै बंगलादेशलाई हराउँदै उपाधि उचालेको थियो । भारत प्रतियोगितामा ७ पटकको विजेता हो । त्यस्तै, भारत अहिले आईसीसी टी-२० अन्तर्राष्ट्रिय वरीयताको शीर्ष स्थानमा रहेको टिम हो । 

भारतले एसिया कपअघि वेष्ट इन्डिज, इंग्ल्यान्ड र आयरल्यान्डविरुद्धको टी-२० अन्तर्राष्ट्रिय शृंखला जितेको थियो । त्यस्तै, दक्षिण अफ्रिकाविरुद्धको शृंखला बराबरीमा सकिएको थियो । 

तीव्र गतिका बलर जसप्रित बुमराहको अनुपस्थिति कप्तान रोहित शर्माका लागि सबैभन्दा चिन्ताको विषय हो । बुमराह चोटका कारण टिममा छैनन् । उनको अनुपस्थितिमा भारतको तीव्र गति बलिङको नेतृत्व भुवनेश्वर कुमार, आभाष खान र अर्शदीप सिंहको काँधमा आएको छ । आभाष, अर्शदीपमा अनुभवको कमी छ । दुवैले यसै वर्षमात्र टी-२० अन्तर्राष्ट्रिय क्रिकेटमा डेब्यू गरेका हुन् । 

ब्याटिङतर्फ भारतका सूर्यकुमार यादव अहिले उच्च लयमा छन् । उनी टी-२० अन्तर्राष्ट्रिय क्रिकेटमा विश्व वरीयताको दोस्रो नम्बरमा छन् । उनले इंग्ल्यान्डविरुद्ध करियरकै पहिलो टी-२० अन्तर्राष्ट्रिय शतक बनाउन सफल भएका थिए । सूर्यकुमार भारतको मध्यपंक्तिमा दरिलो खम्बा हुन् । टिममा पूर्वकप्तान विराट कोहली, कप्तान रोहित शर्मा, अलराउन्डर हार्दिक पाण्डेय, दीपक हुडा, केएल राहुल, रिषभ पन्तलगायत खेलाडीको उपस्थितिमा भारतले जुनसुकै टोलीलाई हराउन सक्ने क्षमता राख्छ । 

पाकिस्तान
आईसीसी टी-२० अन्तर्राष्ट्रिय वरीयतामा पाकिस्तान तेस्रो नम्बरमा छ । पाकिस्तानलाई अनुमान गर्न नसकिने टिमका रुपमा हेरिन्छ । पाकिस्तानले त्यहीअनुसारको छवि बनाएको छ । तर, पछिल्लो समय पाकिस्तानले एकरुपको प्रदर्शनलाई निरन्तरता दिएको छ । पाकिस्तान पनि विश्वका जुनसुकै टोलीलाई हराउन सक्ने क्षमता राख्दछ । 

पाकिस्तान र भारतबीचको तनावपूर्ण सम्बन्धका कारण खेलमा पनि यी दुई टिमबीचको खेललाई विशेष रुपमा हेरिन्छ । एसिया कपमा पनि दुई टोलीले समूह चरणमै प्रतिस्पर्धा गर्दैछन् ।
 
कप्तान बाबर आजम र मोहम्मद रिजवान आईसीसी टी-२० अन्तर्राष्ट्रिय वरीयताको पहिलो र तेस्रो स्थानमा छन् । दुई ब्याट्सम्यानले टिमलाई राम्रो सुरुआत दिन सक्छन् । 

टी-२० अन्तर्राष्ट्रिय क्रिकेटमा अनुभवको कमी र बलर शाहीन शाह अफ्रिदीको अनुपस्थिति पाकिस्तानको मुख्य चिन्ताको विषय हो । पाकिस्तानले यो वर्ष एकमात्र टी-२० अन्तर्राष्ट्रिय क्रिकेट खेलेको छ, अष्ट्रेलियाविरुद्ध । तीव्र गतिका बलर अफ्रिदी घुँडाको चोटका कारण प्रतियोगिताबाट बाहिरिएका छन् । अफ्रिदीको अनुपस्थिति पाकिस्तानका लागि महँगो पर्न सक्छ ।

श्रीलंका 
श्रीलंका आईसीसी टी-२० अन्तर्राष्ट्रिय वरीयताको आठौँ स्थानमा छ । एसियामा भने भारत र पाकिस्तानपछि श्रीलंका तेस्रो स्थानमा छ । आर्थिक र राजनीतिक संकटबाट गुज्रिएको श्रीलंकन क्रिकेट टिमलाई राम्रो प्रदर्शन गर्दै समर्थकलाई खुसी दिनुपर्ने अभिभारा छ । कप्तान डुसान शनका र उनको टिम पनि महादेशीय उपाधि जित्दै श्रीलंकनलाई उत्प्रेरित गर्नुका साथै केही आशा दिलाउन चाहन्छन् ।

श्रीलंकन क्रिकेट टिममा अलराउन्डरको बाहुल्यता छ । कप्तान शनकासहित टिममा पाँच अलराउन्डर छन् । त्यस्तै, स्पिनरद्वय वानिन्दु हसरंगा र महिश थिकसाना पनि टिममा महत्वपूर्ण छन् । उनीहरुले आफूलाई टी-२० क्रिकेटमा पनि अब्बल बनाउँदै आएका छन् । टी-२० अन्तर्राष्ट्रिय वरीयतामा हसरंगा छैटौँ स्थानमा छन् भने थिकसाना नवौँ स्थानमा छन् ।
 
श्रीलंकालाई पनि चिन्ताको विषय भनेको टी-२० अन्तर्राष्ट्रिय क्रिकेटमा लय समाउन नसक्नु हो । श्रीलंकाले यो वर्ष अष्ट्रेलियाविरुद्ध दुई खेलको टी-२० अन्तर्राष्ट्रिय श्रृंखला खेलेको छ भने भारतसँग एक खेल खेलेको थियो । तीनै खेलमा श्रीलंका पराजित भएको थियो । यसका बाबजुद पनि श्रीलंकन टोलीलाई यसपटक एसियन कपको उपाधि जित्नुपर्ने दबाब छ ।

टी-२० अन्तर्राष्ट्रिय वरीयताको छैटौँ स्थानमा रहेका हसरंगा टिमका महत्वपूर्ण खेलाडी हुन् । स्पिनर हसरंगा दक्षिण अफ्रिकाका तब्रिज शाम्सीसँगै धेरै विकेट लिनेको शीर्ष स्थानमा छन् । यूएईमै सम्पन्न २०२१ को आईसीसी टी-२० विश्वकपमा ह्याट्रिक विकेट लिन सफल हसरंगाले ब्याटिङमा पनि राम्रो प्रदर्शन गर्न सक्छन् । 

बंगलादेश
बंगलादेश विश्व वरीयतामा श्रीलंकाभन्दा पछाडि नवौँ स्थानमा छ । बंगलादेशले पछिल्लो दुई संस्करणमा आफूलाई ‘सरप्राइज प्याकेज’का रुपमा प्रस्तुत गरेको छ । २०१६ मा एसिया कप टी-२० स्वरुपमा खेलाइँदा बंगलादेश उपविजेता बनेको थियो । दुई वर्षपछि एकदिवसीय स्वरुपमा खेलाइएको एसिया कपमा पनि बंगलादेशले फाइनलमा स्थान बनाउन सफल भएको थियो । के ‘बंगला टाइगर’ लगातार तेस्रोपटक उपाधिका लागि खेल्छ त ? भन्ने प्रश्न सबैको मुखमा छ ।

अनुभवी शाकीब अल हसन पुनः कप्तानको जिम्मेवारीमा फर्किएका छन् । र, उनी टी-२० विश्वकपसम्मै कप्तानको भूमिकामा रहनेछन् । त्यसोत बंगलादेशका नेतृत्व गर्न सक्ने थुप्रै खेलाडी छन् । त्यसकारण शाकीबले माहुदुल्लाह र मुश्फिकर रहिमबाट साथ पाउनेछन् । टिममा शाकीबको भूमिका महत्वपूर्ण हुनेछ । अलराउन्डर शाकीबको प्रदर्शनले टिमको नतिजा पनि फरक पार्नेछ । 

बंगलादेशले यो वर्ष कुनै टी-२० अन्तर्राष्ट्रिय श्रृंखला जित्न सकेको छैन । अफगानिस्तानविरुद्धको श्रृंखला बराबरीमा सकिएको थियो भने वेष्ट इन्डिज र जिम्बाब्वेविरुद्धको श्रृंखलामा पराजित भएको थियो ।

अफगानिस्तान
अफगानिस्तानका खेलाडीहरु अहिले विश्वभर भएका शीर्ष टी-२० लिगमा व्यस्त छन् । जसका कारण उनीहरुसँग ट्वान्टी-२० क्रिकेटको प्रशस्त अनुभव छ । उनीहरुले टिमका रुपमा पनि ‘सरप्राइज’ नतिजा दिइरहेका छन् । आईसीसी टी-२० वरीयतामा पनि अफगानिस्तान दशौँ स्थानमा छ ।
 
अफगानिस्तानमा राम्रा स्पिनरहरुको बाहुल्य छ । विश्व चर्चित रशीद खान, कप्तान मोहम्मद नाबी, मुजीब रहमान र १७ वर्षे नूर अहमदले जुनसुकै खेल जिताउन सक्ने क्षमता राख्छन् । रशीद अहिले विश्वकै उत्कृष्ट स्पिनरमध्येमा पर्छन् । उनी विश्व वरीयताको पाँचौँ स्थानमा छन् । लेग स्पिनर रशीद विश्वका उत्कृष्ट ब्याट्सम्यानका लागि पनि चुनौती हुन् ।

अफगानिस्तान पछिल्लो समय आयरल्यान्डविरुद्ध खेलेको टी-२० अन्तर्राष्ट्रिय श्रृंखलामा ३-२ ले पराजित भएको थियो । पहिलो दुई खेल हारेर पनि अफगानिस्तानले लगातार दुई खेल जित्दै श्रृंखलामा २-२ को बराबरी गरेको थियो । तर, वर्षाले प्रभावित अन्तिम खेल भने अफगानिस्तानले जित्न सकेन । जिम्बाब्वेविरुद्धको शृंखला क्लिनस्विप गरेको अफगानिस्तानले बंगलादेशविरुद्धको शृंखला भने बराबरीमा टुंग्याएको थियो ।

हङकङ
हङकङ छनोट चरण पार गरेर एसियन कप खेल्न लागेको टोली हो । २४ अगष्टमा ओमानमा सम्पन्न छनोट खेलमा यूएईमाथि आठ विकेटको रवाफिलो नतिजा निकाल्दै हङकङले एसिया कपमा स्थान बनाएको हो । छनोट चरणमा हङकङले यूएईलाई हराउनुअघि सिंगापुर र कुवेतलाई पनि समान आठ विकेटको नतिजामा पराजित गरेको थियो ।
 
हङकङलाई एसिया कप खेल्न पाउनु एक अवसर हो । आईसीसी टी-२० वरीयतामा हङकङ २३ औँ स्थानमा छ । र, प्रतियोगिताको समूह ‘ए’मा रहेको हङकङले पहिलो खेलमै उपाधि दाबेदार भारतविरुद्ध प्रतिस्पर्धा गर्नुपर्नेछ । अर्को खेलमा पाकिस्तानसँग खेल्नेछ । त्यसकारण हकङकका लागि प्रतियोगिता सहभागितामा सीमित हुने सम्भावना प्रबल छ ।