काठमाडौं । राष्ट्रियसभा सदस्य खिमलाल देवकोटाले नागरिकतासम्बन्धी विधेयकको खुकुलो प्रावधानले नेपालमा संगठित अपराध बढ्ने बताएका छन् ।

बिहीबार राष्ट्रियसभा बैठकमा नेपाल नागरिकता (पहिलो संशोधन) विधेयक, २०७९ माथिको दफावार छलफलका क्रममा सांसद देवकोटाले विधेयकमा वैवाहिक अंगीकृतको सम्बन्धमा खुकुलो प्रावधान राखिएको बताए ।

उनले विदेशी बुहारीलाई नागरिकता दिन ६ महिना पनि कुर्न नसकेको टिप्पणी गरे । यो प्रावधानले नेपालमा संगठित किसिमको अपराध बढ्ने उनको भनाइ छ ।

सांसद देवकोटाले ‘तीन करोड पनि जनसंख्या नभएको नेपालमा ३०० करोड जनसंख्या भएको चीन र भारतको जनसंख्याको सानो अंश यताउता गर्दा नेपालको हालत के होला ?’ भन्दै प्रश्न गरे ।