काठमाडौं । बाल्टिमोर एसोसियसन अफ नेप्लिज इन अमेरिका (बाना) को आयोजनामा सुरु भएको बाना कप भलिबल प्रतियोगितामा आइतबार क्वार्टरफाइनल समीकरण पूरा भएको छ ।
बाल्टिमोरको जोसेप स्पोर्टस कम्प्लेक्समा आजबाट सुरु भएको प्रतियोगितामा पुरक्षतर्फका टेक्सासको सुदूरपश्चिमसँगै बेलमोन्ट बाल्टिमोर, बाल्टिमोर युथ क्लब, एनआरएनए मेरिल्याण्ड, योङ ब्लड पेन्सलभेनिया, बागलुङ समाज मेरिल्यान्ड, सिन्धुबुद्ध न्युयोर्क र न्युयोर्क ह्वाइटसे अन्तिम आठमा स्थान बनाए ।
१८ टिमको सहभागिता रहेको पुरुष तर्फको प्रतियोगितामा समुह 'ए' बाट फारवेस्ट टेक्सास विजेताका रुपमा अन्तिम चारमा स्थान बनायो भने बेलमोन्ट उपविजेताका रूपमा क्वार्टरफाइनलमा स्थान बनायो ।
यस्तै समूह 'बी'बाट बाल्टिमोर युथ क्लब विजेता र एनआरएनए मेरिल्यान्ड उपविजेताका रूपमा क्वार्टरफाइनलमा पुगे । समूह बी बाट योङ ब्लड विजेता र बागलुङ समाज उपविजेताको रूपमा अन्तिम आठमा पुगे ।
समूह डी बाट सिन्धु बुद्ध र न्युयोर्क ह्वाइटले अन्तिम आठमा पुगे । क्वार्टरफाइनलमा फारवेस्ट टेक्सास र बागलुङ समाजबीच प्रतिस्पर्धा हुनेछ भने बेलमोन्ट र योङ ब्लड, बाल्टिमोर युथ र न्युयोर्क ह्वाइट, एनआरएनए मेरिल्यान्ड र सिन्धु बुद्धबीच प्रतिस्पर्धा हुनेछ ।
बानाको आयोजनामा दोस्रो पटक भइरहेको प्रतियोगितामा महिला टिमलाई भने पहिलो पटक समावेश गरिएको हो । महिला तर्फ चार टिमको सहभागिता रहेको छ ।
प्रतियोगिताको बिजेताले पाँच हजार ५ सय ५५ अमेरिकी डलर पाउने छ भने उपविजेताले ३ हजार ३ सय ३३ डलर पाउने छन् ।
प्रतियोगिताको उद्घाटन बाल्टिमोर काउन्सिल म्यान डेविड मार्क्स, बानाका अध्यक्ष सुबोध बिलास पन्तले संयुक्त रूपमा गरेका थिए । यस्तै उद्घाटन कार्यक्रममा बानाका महासचिव सागर घिमिरेसहित अन्य पदाधिकारीको पनि उपस्थिति रहेको थियो ।
यस्तै डिस्ट्रिक्ट ८ का हाउस अफ डेलिगेट प्रतिस्पर्धी ग्लेन गिलहर, बाना ट्रस्टी मेम्बर प्रभु थापा, बानाका सल्लाहकार दमनबिक्रम शाह र बाना स्पोर्टस कोर्डिनेटर भिम केसीको उपस्थिति रहेको थियो ।
