काठमाडौं । क्रिकेट स्कटल्याण्ड बोर्डका सदस्यहरूले खेलमा जातीय भेदभावको समीक्षा प्रकाशित हुनुभन्दा एक दिन अगाडि आइतबार सामूहिक राजीनामा दिएका छन् ।

चाँडै स्कटल्यान्डको खेलमा संस्थागत नस्लवाद रहेको निष्कर्षसहितका प्रतिवेदन सार्वजनिक हुने अपेक्षा गरिएको छ । आइतबार बिहानै  बोर्डका निर्देशकहरूले अन्तरिम प्रमुख कार्यकारी अधिकृत (सीईओ)लाई राजीनामापत्र बुझाएका थिए ।

आगामी दिनमा क्रिकेट खेललाई अघि बढाउनका लागि स्पोर्ट स्कटल्यान्डसँग सहकार्य गरेर अघि बढ्ने बताइएको छ । 

“हामी सबै साँच्चै क्षमाप्रार्थी छौँ र स्कटल्याण्ड क्रिकेटमा नस्लवाद, वा अन्य कुनै पनि प्रकारको भेदभावको अनुभव गर्ने सबैसँग सार्वजनिक रूपमा माफी माग्दछौँ,” उनीहरूले राजीनामापत्रमा लेखेका छन् ।

सीईओलाई पठाएको पत्रमा उनीहरूले प्रतिवेदनमा लेखिएका विषयवस्तुबारे थाहा नभएको बताएका छन् । तर, उनीहरूले ‘प्रस्तावित समय तालिका र अनिवार्य रूपमा गर्नुपर्ने कार्यहरू’ बारे सचेत गराइएका छन् ।

उनीहरूले जातिवादका मुद्दाहरूको द्रुत समाधान खोज्ने योजना, र खेल शासनलाई आधुनिकीकरण गर्ने योजना प्रस्तावित समय तालिका र वर्तमान शासन ढाँचाभित्र असम्भव भएको बताएका छन् । 

स्पोर्टस्कटल्याण्डलाई अनुदान दिने निकायले गत वर्षदेखि नस्लवादको अनुसन्धान सुरु गरेको थियो । त्यसको प्रतिवेदन सोमबार प्रकाशित हुने भएको छ ।