काठमाडौं । दिनेश चन्डीमलले ८० रन बनाएपछि श्रीलंकाले पाकिस्तानविरुद्ध दोस्रो टेष्टको पहिलो दिन राम्रो सुरुआत गरेको छ । 

श्रीलंकाको गल अन्तर्राष्ट्रिय क्रिकेट मैदानमा पहिलो दिन सकिँदा घरेलु टोली ३१५/६ को स्थितिमा छ ।

श्रीलंकाका निरोशन दिकवेला ४२ र डुनिथ वेलालेग ६ रन बनाएर क्रिजमा छन् । 

टस जितेर पहिलो ब्याटिङ गरेको श्रीलंकाका ओपनर ओशादाा फर्नान्डो र कप्तान दिमुथ करुणारत्नेले पहिलो विकेटका लागि ९२ रनको साझेदारी गरेका थिए । फर्नान्डोले ५० रन बनाए भने करुणारत्नेले ४० रन बनाए । कुशल मेन्डिस ३ रनमा आउट भए । 

श्रीलंकाका लागि १००औँ टेष्ट खेलेका एन्जेलो म्याथ्युज र दिनेश चन्डीमलले चौथो विकेटका लागि ७५ रनको साझेदारी गरे । म्याथ्युज ४२ रन बनाएर आउट भए ।

त्यसपछि चन्डीमलले धनन्जय डी सिल्भासँग पाँचौँ विकेटका लाग ६३ रनको साझेदारी गरे । डी सिल्भा ३३ रन बनाएर पवेलियन फर्किए । चन्डीमल ८० रनमा पवेलियन फर्किए । 

पाकिस्तानका मोहम्मद नवाजले दुई विकेट लिए । नसीम शाह, नौमन अली र यासिर शाहले एक एक विकेट लिए । 
गल क्रिकेट मैदानमै सम्पन्न पहिलो खेलमा पाकिस्तान ४ विकेटले विजयी भएको थियो ।