काठमाडौं । ललितपुर महानगरपालिकाले एक सयवटा साइकल सञ्चालनमा ल्याउने तयारी गरेको छ । महानगरले साइकल लेन प्रयोगमा ल्याउन र सर्वसाधारणको सुविधाका लागि ई–साइकल सेवा सञ्चालनमा ल्याउने तयारी गरेको हो । 

महानगरले पहिलो चरणमा १०० वटा साइकल किनेर चार ठाउँबाट सञ्चालन गर्न लागेको महानगरका नगरप्रहरी प्रमुख सिताराम हाछेथुले बताए । साइकल अनलाइनमार्फत बुकिङ गरेर चलाउन सकिनेछ ।

“महानगरपालिकाले १०० वटा साइकल किन्छ । त्यसपछि २५–२५ वटा साइकल चार वटा चोकमा राखिन्छ । मोबाइल एपबाट नै साइकल बुक गर्न सकिनेछ । गन्तव्यस्थलमा पुगेपछि पुन: साइकल स्ट्यान्डमै ल्याएर राख्ने हो,” हाछेथुले भने । 

प्रयोगकर्ताले आफूले चलाउने समयको आधारमा पैसा दिनुपर्ने व्यवस्था गरिनेछ । उनीहरूले एउटा स्ट्यान्डबाट अर्को स्ट्यान्डसम्म साइकल प्रयोग गर्न सक्ने हाछेथुले बताए । 

"सबै मानिसहरू साइकल मोटरसाइकल किन्न सक्ने हैसियतका हुँदैनन् । उनीहरूका लागि पनि थप सुविधा हुन्छ । बिहानको समयमा मर्निङवाक लगायतका कामहरूमा पनि प्रयोग गर्न सकिनेछ,” हाछेथुले भने । 

महानगरले अहिले साइकल लेन बनाइरहेको छ । महानगर र सडक विभागको समन्वयमा थप फुटपाथ निर्माण र साइकल लेन बनिरहेको हाछेथुेले बताए ।

अहिले पैदलयाुत्र र आम सर्वसाधारणको सुविधाका लागि फुटपाथ खालि गर्ने, सडकमा भएर अव्यवस्थित संरचना भत्काउने तथा व्यवस्थापन गर्ने काम भइरहेको छ ।

साइकल सञ्चालने ट्राफिक जाम, फुटपाथ, प्रविधिमैत्री संरचना निर्माणमा पनि सहयोग गर्ने महानगरको विश्वास छ । महानगरपालिकाले पहिलो चरणमा २२ किलोमिटर साइकल लेन बनाएको थियो । अहिले दोस्रो र तेस्रो चरणको योजना अन्तर्गत काम भइरहेको महानगरले जनाएको छ । 

महानगरले ललितपुरभित्रको धुँलोधुँवा कम गर्न विद्युतीय सवारी साधनलाई पनि जोड दिँदै आएको छ । 

तस्बिहररू : अभिषेक महर्जन/बाह्रखरी