काठमाडौं । नेपाली युवा टोलीले सोमबार यू–१९ साफ च्याम्पियनसिपको पहिलो खेलमा माल्दिभ्ससँग प्रतिस्पर्धा गर्दैछ ।

माल्दिभ्सविरुद्धको खेलमा नेपालका कप्तान आयुष घलानले आफुहरू बिना दबाब खेल्ने बताएका छन् । आइतबार भारतको भुवनेश्वरमा सम्पन्न पत्रकार सम्मेलनमा बोल्दै आयुषले भने, “यस प्रतियोगिताका लागि धेरै कडा मिहिनेत गरेका छौँ । पहिलो खेल माल्दिभ्ससँग छ । अन्तिम समयसम्म हामी हिम्मत हार्नेछैनौँ । हामीले यहाँ गुमाउनु केही छैन । त्यसकारण बिना दबाब खेल्नेछौँ । ३ अंक लिएर हामी सुखद सुरुआत गर्न चाहन्छौँ ।”

कोभिड–१९ महामारीका कारण यसपटक अखिल नेपाल फुटबल संघ (एन्फा)ले पछिल्लो समय यू–१८ प्रतियोगिता गर्न सकेन । त्यसको यू–२० साफ च्याम्पियसिपको टिम छनोटमा पनि देखिएको छ ।

घरेलु प्रतियोगितामा सफलता हासिल गरेका प्रशिक्षक केसीले खुला छनोटमार्फत नेपालभरका झन्डै ७०० जनाबाट ४१ खेलाडी छनोट गरका थिए । केसीले असार १९ गते ११ जनालाई बिदा गरेर ३० खेलाडीमा टिमलाई झारेका थिए । प्रशिक्षक केसीले साउन २ गतेमात्र ३० बाट अन्तिम २३ खेलाडी टुंगो लगाएका थिए ।

मेघराज केसीले झन्डै डेढ महिनाको तयारी भए पनि टिम राम्रो बनेको बताएका छन् । तर, उनले समूह चरण भएका कारण विपक्षी टिमबारे धेरै ज्ञान नहुनु टिमको कमजोरी रहेको बताएका छन् । 

“हाम्रो समस्या भनेको उमेर समूहको खेल भएका कारण साफमा सहभागी अन्य टिमबारे धेरै थाहा छैन । तर, हामी राम्रो नतिजाका लागि खेल्नेछौँ,” नेपालका मुख्य प्रशिक्षक केसीले भने, “तर, हामीलाई साफमा अन्य टिमको स्तर कहाँ छ भनेर थाहा छ । हामीले त्यसै अनुसार तयारी गरेका छौँ। सबै टिमको सम्मान गछौँ ।  हामी यहाँ जित्नका लागि आएका हौँ ।माल्दिभ्सविरुद्धको खेल कठिन हुनेछ । तर, जितका साथ प्रतियोगिताको सुरुआत गर्न चाहन्छौैँ ।”

नेपालका कप्तान आयुष घलानसँग राष्ट्रिय टिमको अनुभव छ । त्यस्तै कृतिसरत्न छोन्जुलगायत केही खेलाडीसँग ‘ए’ डिभिजन लिगको अुनभव छ ।

माल्दिभ्सको पनि तीन खेलाडीले राष्ट्रिय टिमको प्रारम्भिक छनोटमा स्थान बनाएका थिए ।

माल्दिभ्सका प्रशिक्षक अहमद शाकिरले आफूले भारतलाई मात्र बलियो टोलीको रूपमा हेरेको बताएका छन् । उनले थपे, “व्यक्तिगत रूपमा भारत बलियो टोली हो । उनीहरू २, ३ वर्षदेखि सँगै खेलिरहेका छन् । हाम्रो पनि तीन खेलाडीले राष्ट्रिय टिमको प्रारम्भिक छनोटमा स्थान बनाउन सफल भएका थिए । यस प्रतियोगितामा म धेरै आशावादी छु ।”

नेपालले माल्दिभ्सविरुद्ध भुवनेश्वरको कालिंगा रंगशालामा नेपाली समयअनुसार दिउँसो ४ः१५ बजे खेल्नेछ ।

माल्दिभ्सका प्रशिक्षक शाकिरले नेपाली युवा टोली आफ्ना लागि पनि नौलो भएका कारण खेल्न कठिन हुने बताए । उनले थपे, “तर, टिमका अधिकांश खेलाडी माल्दिभ्सको शीर्ष श्रेणीको लिग खेलिरहेका छन् । त्यसकारण नतिजा आफ्नो पक्षमा आउने विश्वास छ ।” 

यसअघि १९ र १८ वर्षको उमेर समूहमा हुँदै आएको यस प्रतियोगिता यसपटक २० वर्ष मुनिको उमेर समूहमा हुन लागेको हो । नेपालले पहिलो र दोस्रो संस्करणको उपाधि जितेको थियो । तर, पछिल्लो संस्करण भारतले जितेको थियो । 

प्रतियोगितामा नेपालले दोस्राे खेल श्रीलंकासँग जुलाई २७, भारतसँग जुलाई ३१ र बंगलादेशसँग अगस्ट २ मा खेल्नेछ । राउण्ड रोबिन लिग पछि तालिकाको शीर्ष दुई टोलीबीच अगस्ट ५ मा फाइनल खेल हुनेछ ।