काठमाडौं । आइतबार धितोपत्र दोस्रो बजार मापक नेप्से परिसूचक ६१ अंक बढेको छ । गत करोबार दिन २७ अंक घटेको नेप्से चालु आर्थिक वर्षको मौद्रिक नीति सार्वजनिक पछिको पहिलो कारोबार दिन भने ३.०३ प्रतिशत बढेर २०७८.५१ विन्दुमा पुगेको हो । त्यस्तै आज दुई अर्ब ७३ करोड रुपैयाँभन्दा बढीको शेयर कारोबार भएको छ ।

मौद्रिक नीतिले धितोपत्र बजारलाई सम्बोधन गरेकाले पनि आइतबारको बजारमा हरियाली देखिएको लगानीकर्ताको बुझाइ छ । अहिलेको मौद्रिक नीतिले साना लगानीकर्ताको हितमा स्पष्ट व्यवस्था गरिदिएकाले पनि लगानीकर्ता उत्साहित भएको लगानीकार्ता नयनसिंह बास्तोलाले जानकारी दिए । उनका अनुसार अहिलेको मौद्रिक नीतिले साना लगानीकर्ताको हित सोचेको छ ।

आज सेन्सेटिभ इन्डेक्स पनि ३.१३ प्रतिशतले वृद्धि भएर ३९८.३३ विन्दुमा पुगेको छ । कारोबारमा आएका २१९ धितोपत्रमध्ये तीन कम्पनीको सेयर मूल्यमा सकारात्मक सर्किट लागेको छ ।

सेयर मूल्यमा सकारात्मक सर्किट लाग्नेमा सेन्ट्रल फाइनान्स, समृद्धि फाइनान्स र मल्टीपर्पस फाइनान्स रहेका छन् । यी कम्पनीको सेयर मूल्य १० प्रतिशतले वृद्धि भएसँगै सकारात्मक सर्किट लागेको हो । कारोबार अवधिभर कुनै पनि कम्पनीको सेयर मूल्य १० प्रतिशतभन्दा बढी बढ्दैन । यदि कम्पनीको सेयर मूल्य कारोबार अवधिको कुनै पनि समयमा कारोबार बन्द हुन्छ ।

कारोबारमा आएका १३ वटै समूहको उपसूचक वृद्धि भएको छ । आज वित्त समूहका लगानीकर्ताले सर्वाधिक कमाएका छन् । यो समूहको उपसूचक ७.२२ प्रतिशत वृद्धि भएको छ । उपसूचक सर्वाधिक वृद्धि हुने दोस्रोमा ‘अन्य’ समूह रहेको छ ।

सर्वाधिक रकमको सेयर खरिद–बिक्री शिभम् सिमेन्टको भएको छ । यो कम्पनीको ३९ करोड ७१ लाख रुपैयाँको शेयर खरिद–बिक्री भएको छ । त्यसैगरी दोस्रोमा नेपाल पुनर्बीमा कम्पनीको ६ करोड ८२ लाख रुपैयाँको शेयर खरिद–बिक्री भएको छ ।