विराटनगर । प्रदेश नम्बर एकको नाम किराँत हुनुपर्ने माग गर्दै किराँत राई यायोख्खाले सोमबार प्रदेश राजधानी विराटनगरमा प्रदर्शन गरेको छ ।

मुख्यमन्त्री तथा मन्त्रिपरिषद् कार्यालय र प्रदेशसभा सचिवालय भवन अगाडि यायोख्याले प्रदर्शन गर्दै प्रदेशको नाम किराँत राख्न माग गरेको हो ।

मोटरसाइकल र्यालीसहित यायोख्खाका सदस्यहरूले किरात प्रदेशको पक्षमा नाराबाजी गरेका छन् ।

उनीहरूले सरकारको ध्यानाकर्षण गर्न प्रदेशका सभामुख प्रदीपकुमार भण्डारीसँग भेटघाट गरी आफ्नो मागको विषयमा जानकारी गराए । प्रदेशसभा सचिवालय अगाडि आयोजना गरिएको कोणसभामा यायोक्खा सम्बद्ध कार्यकर्ताले प्रदर्शन गरे । 

यायोक्खाका केन्द्रीय अध्यक्ष दिवस राईले प्रदेशको नामकरण किराँत नै हुनुपर्ने आफूहरूको माग रहेको बताए । उनले भने, “पहिचानको हिसाबले प्रदेशको नाम किराँत नै हुनुपर्छ भन्ने हाम्रो माग हो ।” राईले प्रदेशको पहिचानको लागि पनि किराँत प्रदेश नै आवश्यक रहेको दाबी गरे ।

यायोक्खा सम्बद्ध पदाधिकारीले मुख्यमन्त्री राजेन्द्र राईलाई ज्ञापन पत्र बुझाएर आफ्नो मागबारे जाकारी गराएका छन् । 

यायोक्खाको प्रतिनिधि मण्डलले नेपाली कांग्रेस प्रदेश एकका प्रमुख सचेतक सूयर्माराज राईसँग भेटघाट गरी किराँत प्रदेशको नामको विषयमा सकारात्मक वातावरण बनाइदिन ध्यानाकर्षण गराएका छन् । 

नेपाली कांग्रेस पहिचानवादी संघर्ष समितिले पनि प्रमुख सचेतक राईसमक्ष भेटेर आफ्ना मागबारे जानकारी गराएको छ । 

समितिका सचिव सुशील राईले कांग्रेस प्रमुख सचेतक सूयर्माराज राई समक्ष ज्ञापन पत्र बुझाइ पहिचान झल्कने नाम राख्न ध्यानाकर्षण गराएका छन् । पत्रमा लिम्बुवान–किराँत प्रदेश नाम हुनुपर्ने र विशेष स्वायत्त क्षेत्रहरू घोषणा गरिनुपर्ने माग गरिएको छ । 

प्रमुख सचेतक राईले औपचारिक रूपमा राखिएका मागबारे आफ्नो दललाई जानकारी गराउने समितिका पदाधिकारी समक्ष जानकारी गराए ।