मोन्ट्रियल । सन् १९८५ मा एयर इन्डियाको उडानमा बम विस्फोट गराएको अभियोगमा सफाइ पाएका एकजना पुरुषलाई क्यानडामा गोली हानी हत्या गरिएकाे प्रहरीले जनाएको छ । 

रिपुदामन सिंह मलिकलाई योजनाबद्ध तरिकाले हत्या गरेको प्रहरीले आशंका गरेको छ । ब्रिटिस कोलम्बियाको सर्रीमा आफ्नै कारभित्र गोली हानी हत्या गरिएका उनलाई कार नजिकै जलाइएको अवस्थामा फेला पारिएको थियो । 

विमानमा सवार ३२९ जना मानिसको ज्यान जाने गरी गराइएको बम विस्फोटमा मलिकले आफ्नो हात नरहेको अडान लिँदै आएका थिए । 

उनलाई सन् २००५ मा उक्त अभियोगमा सफाइ दिइएको थियो । तर, प्रहरीलाई अनुसन्धानमा गोलमाल गरेको आरोप लागेको थियो । 

सन् १९८४ मा सिखहरूको पवित्र धार्मिक स्थल ‘स्वर्ण मन्दिर’मा तत्कालीन भारत सरकारले फौज प्रवेश गराएको बदला स्वरूप क्यानडास्थित सिख समुदायले विमानमा बम विस्फोट गराइएको हुनुपर्ने विश्वास गरिन्छ । यसलाई क्यानडाको अहिले सम्मकै सबैभन्दा भयावह आतंककारी घटनाको रूपमा सम्झिने गरिएको छ । 

दुई वर्षसम्म मुद्दा चलेपछि सिख व्यापारी मलिक र अर्का आरोपित अजाइव सिंह बाग्रीलाई दुई वटा बम विस्फोट गराइ आम नरसंहारको षड्यन्त्र रचेको अभियोगबाट सफाइ दिइएको थियो ।

क्यानडाली प्रहरीले मलिकको हत्या पछाडिको उद्देश्य पत्ता लगाउन अझै अनुसन्धान गरिरहेको बताएको छ । 

सन् १९८५ को २३ जुनमा एयर इन्डियाको कल साइन १८२ बोकेर क्यानडाबाट भारततर्फ उडिरहेको विमान आइरिस तटीय क्षेत्रमा विस्फोट भएको थियो । त्यसमा मारिनेमध्ये अधिकांश भारतमा आफन्तलाई भेट्न जाँदै गरेका क्यानडाली नागरिक परेका थिए । 

ठ्याक्कै त्यहीबेला जापानमा नियोजित समय भन्दा पहिल्यै अर्को एउटा बम विस्फोट हुँदा ब्यागेज मिलाउँदै गरेका दुई व्यक्तिको ज्यान गएको थियो । 

बीबीसीबाट ।