रोम । लोकप्रियातावादी गठबन्धनका साझेदार फाइभ स्टारले बिहीबार इटलीको सिनेटमा भएको विश्वासको मतदानबाट आफूलाई अलग्याएपछि इटालीका प्रधानमन्त्री मारियो ड्राघीको नेतृत्वमा रहेको सरकार धराशायी हुने स्थितिमा पुगेको छ । 

सन् २०२१ को फेब्रुअरीदेखि युरोपेली केन्द्रीय बैंकका पूर्वअध्यक्ष ड्राघीले एकता सरकारको नेतृत्व सम्हालेका थिए । 

तर, फाइभ स्टारका नेता गिउसेप्पे कोन्टेले प्रधानमन्त्री ड्राघीलाई मुलुकमा महँगिँदै गइरहेको जीवनयापन समस्या समाधान गर्न नसकेको आरोप लगाएका थिए । 

सिनेटमा भएको मतदानमा सजिलैसँग विजय हासिल गरेपनि ड्राघीको राजनीतिक भविष्य अहिले शंकाको घेरामा रहेको छ । उनले फाइभ स्टार बिना सरकार निरन्तर हुन नसक्ने अडान पटक पटक दोहाेर्‍याएका छन् । 

मतदानको परिणाम आएलगत्तै उनी राष्ट्रपति सर्गियो म्यात्तारेल्लालाई भेट्न पुगेका थिए । राष्ट्रपतिले उनलाई सरकारमा बसिरहन अनुरोध गर्ने अपेक्षा गरिएको थियो । 

‘सुपर मारियो’ उपनामले पनि चिनिने प्रधानमन्त्री ड्राघीले राजनीतिक समर्थन अभावको कारण देखाउँदै राजीनामा दिए इटालियन जनताले चाँडै नै अर्को चुनावमा भाग लिनुपर्ने अनुमान गरिएको छ ।

बिहीबारको मतदान इटालियन परिवार र व्यापारी तथा व्यवसायीलाई आर्थिक सहयोग प्रदान गर्ने अर्बौँ डलरको प्याकेजको मतसँग जोडिएको थियो । 

युरोपेली संघ (इयू)का आर्थिक आयुक्त तथा इटलीकै पूर्वप्रधानमन्त्री पावोलो जेन्टिलोनीले इयूको कार्यकारिणीले हस्तक्षेप नगर्ने गरी तथा चिन्तित र आश्चर्यमिश्रित भावले रोममा विकसित भइरहेको राजनीतिक घटनाक्रम हेरिरहेको जानकारी दिएका छन् । 

बीबीसीबाट ।