वासिङटन । अमेरिकाको सार्वजनिक यातायात सेवा उवर चालकहरूमाथि यौन उत्पीडनको आरोप लागेको छ । 

उवर चालकले आफूहरूमाथि यौन उत्पीडन गरेको भन्दै ५५० जना महिलाले क्षतिपूर्तिको माग गरेका छन् । 

उनीहरूले दायर गरेको उजुरीमा उवर चालकहरूले महिला यात्रुलाई अपहरण, यौन उत्पीडन, यौन आक्रमण र बलात्कार गरेका तथा झुटो बन्दी बनाइएको, पछ्याएको र हतोत्साहित गरेको गुनासाहरू उल्लेख गरिएका छन् । 

क्षतिपूर्तिको मागसहित बुधवार सान फ्रान्सिस्को काउन्टी उच्च अदालतमा मुद्दा दायर गरिएको हो । 

यस सम्बन्धमा उवरका एकजना प्रवक्ताले भनेका छन्, “यौन उत्पीडन डरलाग्दो अपराध हो । हामीले प्रत्येक प्रतिवेदनलाई गम्भीर ढंगले लिनेछौँ । सुरक्षा भन्दा ठूलो महत्वपूर्ण अरु केही छैन । यसकै कारण उवरले नयाँ सुरक्षा विशेषताहरू निर्माण गरेको छ । ‘सर्भाइभर–सेन्ट्रिक’ नीतिहरू सुरु गरेको उवर गम्भीर घटनाहरूका बारेमा थप पारदर्शी भएको छ ।”
 
वकिलहरूले स्लाटर स्लाटर स्कलम्यान ल फर्ममा दायर गरेको उजुरी पत्रमा अमेरिकाका थुप्रै राज्यमा उवरका चालकहरूबाट यौन उत्पीडन भएको उल्लेख गरिएको छ । 

साथै, कम्तीमा १५० वटा अन्य यस्तै घटनामाथि सक्रिय रूपमा अनुसन्धान भइरहेको बताइएको छ । 

बीबीसीबाट ।