कोलम्बो । प्रदर्शन चर्किएपछि भागेर सिंगापुर पुगेका श्रीलंकाका राष्ट्रपति गोताबाया राजापाक्षेले पदबाट राजीनामा दिएका छन् । उनले इमेलमार्फत सभामुखलाई राजीनामा पत्र पठाएको अन्तर्राष्ट्रिय सञ्चारमाध्यमले जनाएका छन् ।

गोताबायाको राजीनामापछि राजधानी कोलम्बोमा प्रदर्शनकारीहरूले खुसियाली र्‍याली निकाले छन् ।

गत मंगलबार राति श्रीलंकाबाट भागेर माल्दिभ्स पुगेका राजपाक्षे त्यहाँबाट सिंगापुर पुगेका हुन् । उनको साथमा उनकी पत्नी र दुईजना अंगरक्षक रहेको बताइएको छ । 

सिंगापुरको विदेश मन्त्रालयले राजापाक्षेले राजनीतिक शरणका लागि अनुरोध नगरेको स्पष्ट पारेको छ । उनलाई शरण पनि नदिइएको सिंगापुरको दाबी छ । 

निमित्त राष्ट्रपति रनिल विक्रमसिङ्घेलाई सपथ ग्रहण नगरेसम्म उनलाई अन्तरिम राष्ट्रपति मानिने छैन । सपथ ग्रहण गरेको ३० दिनभित्र उनलाई संसद्बाट समर्थन पाउनुपर्छ । उनले समर्थन पाउन नसके नयाँ राष्ट्रपति चयनको प्रक्रिया अगाडि बड्छ ।

गोताबायाले लामो समयदेखि राजीनामा दिन अस्वीकार गर्दै आएका थिए ।