काठमाडौं । पर्सामा मानव बेचबिखन तथा ओसारपसारमा संलग्न रहेको आरोपमा एकजना पक्राउ परेका छन् । पक्राउ पर्नेमा रामेछापको मन्थली नगरपालिका–१४ घर भएका ४२ वर्षीय बाबु घिसिङ छन् ।

वीरगन्ज महानगरपालिका–१६ बाट भारततर्फ जान लागेका घिसिङ र २२ वर्षीया युवतीलाई प्रहरीले माइती नेपालका कर्मचारीको उपस्थितिमा नियन्त्रणमा लिइएको थियो ।

अनुसन्धानका क्रममा घिसिङले युवतीलाई भारतको कोलकातास्थित अस्पतालमा मासिक ६० हजार रुपैयाँको काम लगाइदिने प्रलोभन देखाएको खुलेको छ । उनले काठमाडौंमा यही असार २७ गते भेटी सोही दिन वीरगन्ज बसपार्क पुर्‍याएको र प्रहरीको बोर्डर चेकपोस्टमा ‘बाराको अमलेखगन्ज घर हो र भारतको रक्सोलमा कपडा खरिद गर्न जान लागेको’ भन्न सिकाएको पनि खुलेको छ ।

उनीविरुद्ध मानव बेचबिखन तथा ओसारपसार कसुरमा अनुसन्धानका लागि जिल्ला अदालत पर्साबाट पाँच दिनको अनुमति लिइएको प्रहरीले जनाएको छ ।