जनकपुरधाम । उच्च अदालत जनकपुरमा वैशाख ३० गते भएको स्थानीय निर्वाचनसँग सम्बन्धित १४ वटा मुद्दा दर्ता भएका छन् । शुक्रबारसम्म निर्वाचन बदर गर्न चार र पुनः मत गणना गर्न १० वटा मुद्दा दर्ता भएका छन् । दर्ता भएका सबै मुद्दाहरू धनुषा, महोत्तरी र सर्लाही जिल्लाका स्थानीय तहसँग सम्बन्धित छन् ।

अदालतका सूचना अधिकारी कुवेर घिमिरेकाअनुसार सर्लाहीबाट पाँचवटा मुद्दा दर्ता भएका छन् । सर्लाही र धनकौल गाउँपालिकाका तीनवटा मतदानस्थलको निर्वाचन बदर गरी पुनः निर्वाचन गर्न माग गरिएको छ । नेकपा (माओवादी केन्द्र)बाट पालिका अध्यक्षमा उमेदवारी दिएका फकिरा महतोले निर्वाचन बदर गर्न माग गरेर मुद्दा दिएका हुन् । 

महतोले धनकौल वडा नम्बर ५, उनी निकट रामअधार राय यादवले वडा नम्बर २ र वडा नम्बर १ मा भएको निर्वाचन रद्द गर्न माग गरेका छन् । यहाँको २ नम्बर वडामा बुथ कब्जा गरी नेपाली कांग्रेसका उमेदवारले मतपत्र छापेको आरोप लागेको छ । यहाँ वडाध्यक्ष पदमा १ हजार ४१९ मत ल्याएर नेपाली कांग्रेस रामबहाद्र सहनी निर्वाचित भएका छन् । उनका निकटतम प्रतिद्वन्द्वी रामअधार राय यादवले मात्र ६ मत ल्याएका छन् । 

धनकौलको पालिका अध्यक्ष पदमा नेपाली कांग्रेसका उमेदवार रामआश्रय साह निर्वाचित भएका छन् । साहले महतोलाई एक हजार ९९ मतले पराजित गरेका छन् । साहले ४ हजार ४४४ मत ल्याए भने पराजित भएका महतोले तीन हजार ३७८ मत ल्याएका छन् । यस्तै, सर्लाहीकै हरिवन नगरपालिका ७ मा पुनः मतगणना गर्न माग गरिएको छ । यहाँ नेकपा (एमाले)का उमेदवार निरध्वज कार्की एक मतले निर्वाचित भएका छन् । एक मतले मात्रै पराजित भएका नेपाली कांग्रेसका उमेदवार टीका जंङ्ग थापाले पुनः मतगणना गर्न माग गर्दै मुद्दा दर्ता गराएका छन् । 

मलंगवा नगरपालिका ११ मा पनि पुनः मतगणना गर्न माग गरिएको छ । यहाँ पाँच मतले माओवादीका नन्दकिशोर राय निर्वाचित भएका छन् । उनले जनता समाजवादी पार्टी (जसपा)का राजकिशोर यादवलाई पराजित गरेका छन् । पानो देवीले यस वडामा पुनः मत गणना गर्न मुद्दा दिएकी हुन् । 

महोत्तरीबाट ६ वटा मुद्दा दर्ता भएका छन् । बर्दिबास नगरपालिका ८ को निर्वाचन बदर गर्न माग गरेर मुद्दा परेको छ । यहाँ माओवादीका उमेदवार समशेर सिहं निर्वाचित भएका छन् । एक मतले पराजित भएका एमाले उमेदवार रुद्र बहादुर किङगारिङ मगरले निर्वाचन बदरको माग गरेका छन् । उनले यही जेठ ९ गते अदालतमा मुद्दा दर्ता गराएका थिए ।

बर्दिबास १४ मा पनि पुनः मत गणनाको माग गरिएको छ । यहाँ स्वतन्त्र उमेदवार विजय कुमार महतो एक मतले निर्वाचित भएका छन् । एक मतले कांग्रेसका उमेदवार भरतबहादुर हमाल पराजित भएका छन् । 

यस्तै, महोत्तरीकै भंगहा ७ मा पुनः मत गणना गर्न माग गरिएको छ । यहाँ एक मतले नेपाली कांग्रेसका उमेदवार नरेश साह सुनार निर्वाचित भएका छन् । एक मतले पराजित माओवादीका उमेदवार राजेन्द्र प्रसाद सिंहले पुनः मत गणना गर्नुपर्ने माग गर्दै मुद्दा दर्ता गराएका छन् । यही पालिकाको वडा नम्बर ८ मा पनि पुनः गणना गर्न माग गरिएको छ । यहाँ ६ मतले लोकतान्त्रिक समाजवादी पार्टी (लोसपा)का सरिफ कवारी निर्वाचित भएका छन् । कांग्रेस उमेदवार रामबाबु राउत पराजित भएपछि पुन: गणना गर्न माग गर्दै मुद्दा दायर गरेका छन् । 

महोत्तरीको, महोत्तरी गाउँपालिका १ मा पनि पुनः गणना गर्न माग गरिएको छ । यहाँ एक मतले लोसपाका रञ्जित चौधरी निर्वाचित भएका छन् भने एमालेका उमेदवार मोहमद अनामुल राईन पराजित भएका छन् । चौधरीले ३६६ मत ल्याएका छन् भने राईनले ३६५ मत ल्याएका छन् ।

यसै जिल्लाको एकडारा गाउँपालिका ४ मा पनि पुनः गणना गर्न माग गरिएको छ । यहाँ तीन मतले लोसपाका जिवछप्रसाद यादव निर्वाचित भएका छन् भने जसपाका विन्देश्वर राय पराजित भएका छन् । यादवले ७२० मत ल्याएका छन् भने रायले ७१७ मत ल्याएका छन् । 

यस्तै, धनुषाबाट पनि तीनवटा मुद्दा दर्ता भएका छन् । जनकपुरधाम उपमहानगरपालिका १४ मा पुनः मत गणना गर्न माग गरिएको छ । यहाँ जसपाका पुण्यप्रताप यादव ९ मतले निर्वाचित भएका छन् । नेपाली कांग्रेसका बह्रमदेव मिश्र पराजित भएपछि मुद्दा गरेका हुन् । निर्वाचित यादवले ४१० मत ल्याएका छन् भने पराजित मिश्रले ४०१ मत ल्याएका छन् ।

मिथिला बिहारी ८ मा पनि पुनः मत गणना गर्न माग गरिएको छ । यहाँ एक मतले जसपाका जिवछ यादव निर्वाचित भएका छन् । उनले एमालेका सुरेन्द्र यादवलाई पराजित गरेका छन् । निर्वाचित जिवछको ४०१ र पराजित सुरेन्द्रको ४०० मत आएको छ ।

यस्तै धनुषाधाम वडा नम्बर ८ मा पनि पुनः मत गणना गर्न माग गरिएको छ । यहाँ एमालेका कपिलबहादुर बस्नेत एक मतले विजयी भएका छन् । कांग्रेसका विनोद दीप लामा पराजित भएका छन् । निर्वाचित बस्नेतले ५२२ र पराजित लामाले ५२१ म्त ल्याएका छन् ।