झापा कम्युनिष्ट राजनीतिको उद्गम स्थल मानिन्छ । नेकपा(एमाले) अध्यक्ष केपी शर्मा ओलीको निर्वाचन क्षेत्रमा पर्ने गौरादह नगरपालिकामा पनि कम्युनिष्ट राजनीतिको गढ नै हो ।

तर, २०७४ सालमा भएको स्थानीय तह निर्वाचनमा भने नेकपा(एमाले) सफल हुन सकेन । यहाँ नेपाली कांग्रेसले नगरप्रमुख पद जित्दा उपप्रमुखसहित बहुमत वडा एमालेले जित्यो ।
 

राप्रपा अध्यक्ष राजेन्द्र लिङ्देनको गृह जिल्ला समेत हो झापा । गएको स्थानीय तह निर्वाचनमा यहाँ लिङ्देनको राष्ट्रिय प्रजातन्त्र पार्टी चौथो शक्ति हो । आसन्न स्थानीय तह निर्वाचनबाट भने पहिलो शक्ति बन्ने दाउँमा छ । राप्रपाबाट अहिले संचारउद्यमी समेत रहेका नेता गोपाल पौडेल नगर प्रमुखको उमेदवार छन् । प्रस्तुत छ उनै पौडेलसँग चुनाव विशेष रहेर बाह्रखरीले गरेको कुराकानीको सम्पादीत अंश  :–
 

घरदैलो कार्यक्रम कसरी अघि बढाइरहनुभएको छ ?

हो । अहिले प्रत्येक जनताको घरमा जाने मेरो एजेन्डाहरू राख्ने र मत माग्ने कार्यक्रम जारी छ ।

तपाईं लामो समय देखि सञ्चारउद्यमी, खुला राजनीतिमा आउनुपर्ने कारण चाहिँ के बन्यो ? 

म सञ्चारउद्यमी हुँ । त्यो भन्दा पहिले म यहीँ झापाको गौरादहमा जन्मिएको हुँ । हुर्किएको पनि यहीँ नै हो । मेरो शिक्षा पनि यहीँबाट हो । मैले देश विदेश हेरेँ । विश्वको धेरै देशहरू घुमेको छु ।

झापाको राम्रो ठाउँ भनिए पनि यहाँको अवस्था नाजुक छ । विकास निर्माणमा भने गौरादह नगरपालिका अत्यन्तै पछाडि परेको छ । बाहिर बसेर धेरै नगर यसरी बनाउनुपर्छ, विकासको मोडल यस्तो हुनुपर्छ भनेर सुझाव दिँदा दिँदा पार नलागेपछि अब यो सहर हाम्रो गौरादह हामी बनाउँछौँ भन्ने उद्देश्यका साथ दृढ संकल्प र आत्माविश्वासको साथ मैले उमेदवारी नगर प्रमुखमा दिएको हुँ । 

नगर प्रमुख राप्रपाबाट टिकट पाएर लड्दै हुुनुहुन्छ । पुरानै शक्तिको पछि लागेर चुनाव लड्नुपर्ने अवस्था चाहिँ कसरी आयो ? 

हामीले गणतन्त्रलाई पनि स्वीकार गरेकै छौँ । ४६ साल पश्चात् बहुदलीय व्यवस्थालाई स्वीकार गरेर हामीले दल राप्रपा खोलेका हौँ । ६२/६३ आन्दोलनपश्चात् आएको संविधानलाई पनि आलोचनात्मक स्वीकार गरेकै हौँ । तर, जुन् उद्देश्य र सपना बाँडेर राज्यव्यवस्था परिवर्तन भयो सो अनुरूप देशका जनताले भने सेवा पाएनन् । परिकल्पनाअनुसार जनता उत्साहित भन्दा निरूत्साहित छन् । 

अहिले नेपाल भर राप्रपाको जनलहर आएको छ । मानिसहरूले हामीलाई खोजी खोजी मत दिन्छौँ भन्नुभएको छ । म अहिले घर घर पुग्दा पहिले हामीलाई देख्दा अर्कोतिर फर्कने मानिसहरु अहिले अंगालो मारेर तपाईंहरुको पार्टी र मान्छेको खोजी हामीले गरेका छौँ भन्नुहुन्छ । त्यसकारण देशको आवश्यक्ता अहिले राप्रपा रहेछ भन्ने प्रमाणित भएको छ । 

गौरादहबासीले तपाईंलाई जिताउनैपर्ने आधार र कारणहरू चाहिँ के हुन् ? 

गौरादह शिक्षित मानिसहरूको बसोबास भएको नगर हो । यहीँ ठाउँबाट भोट दिएर केपी शर्मा ओली गृहमन्त्रीहुँदै प्रधानमन्त्री समेत बन्नुभयो । यहीँ गौरादहबाटै शिवमाया तुम्वाहाम्फे, अग्नि खरेल, युवराज खतिवडा लगायतका मानिसहरू मन्त्री भइसक्नुभएको छ । उहाँहरूले यहाँको विकास गर्न सक्नुभएन । 

यहाँको वडानम्बर ४ र ५ भनेको साविक महारानीझोडा गाविस हो । ३६÷३७ सालदेखि त्यहाँका मानिसहरूले जग्गाको कर तिरिरहेका छन् तर, त्यहाँको नक्सा र पूर्जा उनीहरूले पाएका छैनन् । किनबेच गर्न पाउने हो भने करोडौ मुल्य पाउँछन् तर, कागजपत्र नहुँदा बैंकले समेत ऋण पत्याउँदैन । कुनै भ्यालु छैन । यहाँ धेरै पटक नेकपा एमालेले नेतृत्व गरेर यहाँ जितेको ठाउँ हो । तर, अहँ माखो मार्न सकेन । म पनि त्यहीँको बासिन्दा भएको कारणले अब म चाहिँ त्यो समस्या समाधान गर्छु । एक वर्षभित्र मैले त्यो काम सम्पन्न गर्न सकिन भने नगर प्रमुख पद छाडेर हिड्छु भनेर जनतासँग बाचा गरेको छु । 

विगतको नतिजाले नेपाली कांग्रेसलाई नगरको नेतृत्व तथा एमालेलाई उपप्रमुख सहित नगरको जनप्रतिनिधिमा बहुमत छ ।

एउटा पनि गर्व गर्न लायक काम भएन । मैले सार्वजनिक रूपमै यदी एउटा मात्र यो काम चाहिँ हेर्न लायक जनप्रतिनिधिले गरेका छन् भन्ने देखाए मेयर पदबाट फिर्ता भएर उसैलाई सहयोग गर्छु भनेको छु । तर, अह केही भएकै छैन । 

म नगरमा गर्व गर्न सक्ने प्रोजेक्टहरू ल्याएर हामी विकास गर्छु । यो कृषिको उर्वर भुमि हो । तर, प्रत्येक घरका युवाहरु खाडीमा रोजगारीमा छन् । नगरमा मैले जिते पनि विदेशमा पनि भएका युवाहरुलाई नेपाल बोलाएर विना धितो ऋण दिएर स्वरोजगारको कार्यक्रम चलाउँछु । १८, २० विघा जग्गामा यहाँ पोखरी खनिएर राखिएको छ । जसको प्रयोग भएकै छैन । म पर्यटकीय स्थलको रूपमा विकास गरेर नगरको राजश्व वृद्धिमा लगाउनेछौं । 

एजेन्डा भएर मात्र भएन । देशभर गठबन्धन छ । गौरादहमा पनि अवस्था उस्तै छ । गठबन्धन र नेकपा एमालेसँग भिडेर जितको नतिजा निकाल्नु सक्नुहोला ? 

यो कम्युनिष्ट राजनीतिको स्थापित ठाउँ हो विगतमा । तर, धेरै पटक सूर्यमा मत हालेका मानिसहरु हलोमा मत हाल्न आतुर छन् । अघिल्लो पटक रूखमा मत हालेर चुनाव जिताएकाहरु पनि राप्रपाको हलोमा मत हाल्नुपर्छ भन्ने मानसिकतामा छन् । मलाई खोजी खोजी फोन नम्बर पत्ता लगाएर भेटेर हलोमा मत हाल्ने प्रतिवद्धता जनाउनुभएको छ । 

अन्य राजनीतिक दलहरूले काम गर्न नसक्नुनै मेरो जितको आधार हो । अब पनि के गर्न खोजेको वा नगरमा के गर्न चाहेको भन्ने भिजन उहाँहरुसँग छैन । घोषणपत्र र सार्वजनिक ठाउँमा पनि एमाले र कांग्रेस लगायतका गठबन्धनले नगर बनाउने भिजन दिन सकेको छैन । हामीले स्पष्ट भिजन राखेका छौं । दृढ संकल्प र इच्छा शक्ति पनि छ हाम्रो । 

दमक नगरपालिकामा गठबन्धनसँग राप्रपाको गठबन्धन भयो, तपाईंको नगरमा चाहिँ गठबन्धनको प्रयास भएन ?

नेपाली कांग्रेस र नेकपा(एमाले)ले गठबन्धनको प्रस्ताव लिएर आएकै हुन् । उनीहरूले हामीसँग गठबन्धन गर्न चाहेकै हुन् । मिले जाउँ भनेर दुबै दलहरूसँग पटक पटक छलफल चलेकै हुन् । तर, अधिंकास कार्यकर्ताको भावना हामी एक्लै चुनाव लड्नुपर्छ भन्ने थियो । जे हुन्छ हाम्रो शक्ति देखाएर जाउँ , हाम्रो एजन्डेहरू जनतामाझ स्थापीत गरेर जाउँ भन्ने भयो । हामी उनीहरूसँग मिल्नु भनेको उनीहरूले गरेको भ्रष्टचार,विकृती, अनियमित्तामा हामी पनि सहभागी हुनु हो । त्यसकारण हामीले गठबन्धन गर्नुहुँदैन भन्ने निर्णय भएपछि हामी एक्लै चुनावमा होमिएका हौँ ।