मनोज कुमार चौधरी लोकतान्त्रिक समाजवादी पार्टी (लोसपा)बाट जनकपुरधाम उपमहानगरपालिकाको मेयर पदका उमेदवार हुन् । पर्यटन प्रर्वद्धन, फोहोर व्यवस्थापन, लामखुट्टे मुक्त र नगरलाई शैक्षिक ‘हब’ बनाउने योजनासहित उनी जनतासमक्ष पुगिरहेका छन् । चौधरी महन्थ ठाकुर नेतृत्वको तत्कालीन राष्ट्रिय जनता पार्टी (राजपा) ले ०७४ को स्थानीय निर्वाचनमा हासिल गरेको विरासत जोगाउने कसरतमा पनि छन् । तर, पाँच दलीय गठबन्धनलाई जित्न सजिलो भने छैन । अर्कोतिर लोसपाबाट जनकपुरका केही चिरपरिचत अनुहार अन्य दलमा आवद्ध भएको अवस्था छ । प्रस्तुत छ, बाह्रखरीका लागि कमलेश ठाकुरले चाधैरीसँग गरेको कुराकानीको संम्पादित अंश :

तपाईंको उमेदवारी किन ?
जनकपुरधाम उपमहानगरपालिकालाई सरसफाइमा जोड दिन, जनकपुरमा ल्यान्डफिल साइडको स्थापना गर्न, हराभरा जनकपुरधाम बनाउन, लामखुट्टेको आतंक अन्त्य गर्न, शिक्षाको र स्वास्थ्यको स्तर उकास्न, खेलकुदको वातावरण बनाउन, ज्येष्ठ नागरिक, अपाङ्ग र एकल महिलाको भत्ता घरमै पुर्‍याउन, पर्यटन प्रर्वद्धन विकासका लागि  विमानस्थल, बसपार्क र रेलवे स्टेसनबाट निःशुल्क बस सञ्चालन गरी यात्रुलाई जानकी मन्दिरसम्म घुमाउनलगायत अन्य काम गर्न मैले उमेदवारी दिएको छु । 

तपाईंका एजेन्डा के–के छन् ?
जनकपुर बौद्धिक सर्कलको ठाउँ हो । राजनीतिक बौद्धिक व्यक्तित्व यहाँ धेरै हुनुहुन्छ । म निर्वाचित हुने वित्तिकै स्वास्थ्य सेक्टरबाट बौद्धिक सर्कलको सल्लाहकार समिति बनाउँछु । शिक्षाको विज्ञ टिम बनाउँछु । सरसफाइमा लामो समय काम गरेर अवकाश प्राप्त गरेका कर्मचारीको समूह बनाउँछु । पर्यटन क्षेत्रमा काम गर्ने टिमको पनि सल्लाहकार समिति बनाउँछु । र, त्यो समितिले दिने सल्लाह, सुझावअनुसार पालिका सञ्चालन हुन्छ । विज्ञको सल्लाहअनुसार अगाडि बढेपछि शतप्रतिशत एजेन्डा पूरा हुन्छ । 

तपाईंको जित्ने आधार के छ ? 
म जनता बिचको व्यक्तित्व हुँ । जनताको सुख र दुःखमा भाग लिएको छु । र, जनताको सुखदुःखमै साथ दिनेलाई जनकपुरधाम उपमहानगरपालिकाका जनताले चुन्नेछन् । मलाई विश्वास छ, जनताले तनाशाही उमेदवारलाई परास्त गर्नेछन् । जनताले फेलियर भइसकेको उमेदवारलाई कहिले पनि पत्याउदैनन् । पूर्व राजपाका नेताहरू नै अहिले लोसपामा छन् । त्यसकारण त्यतिबेला राजपा दोब्बर मतले विजयी भएको थियो । अब लोसपा दोब्बर मतले विजयी हुन्छ । 

लोसपा तीन ध्रुवमा विभाजित छ । सत्तारूढ दलको गठबन्धन पनि छ । यस्तो अवस्थामा जित निकै कठिन छ नि ? 
अवसरवादीहरू चुनावको समयमा यताउति भइरहन्छन् । टिकट नपाउँदा यताबाट उता जान्छन्, उताबाट यता पनि आउँछन् । त्यस्तै हामीबाट पनि केही गएका छन् । र, अरूबाट पनि हामीसँग केही आएका छन् । जसपाभन्दा तत्कालीन राजपाका ७४ जना निर्वाचित जनप्रतिनिधि लोसपमा आएका थिए । त्यसमध्ये ७० जना अहिले पनि लोसपामै आएका छन् । त्यसकारण तत्कालीन राजपाले जितेको ठाउँमा जित्न हामीलाई कुनै प्रकारको कठिनाइ हुँदैन । 

गठबन्धनको उमेदवारसँग पराजित हुने डर छ ? 
गठबन्धनको उमेदवारसँग डराएको भए त हाम्रो पनि गठबन्धन भइसकेको हुन्थ्यो नि । हामी ढुक्क छौँ । हामीले जनतालाई काम गरेर देखाएका छौँ । जनताको बिचमा गएका छौँ । जनताकै भावनाअनुसार हामी गठबन्धन नगरी ढुक्क भएर निर्वाचनमा होमिएका छौँ । मलाई कुनै उमेदवारसँग पराजित हुने डर छैन । मेरो कुनै दल वा उमेदवारसँग प्रतिस्पर्धा पनि हुँदैन । म झण्डै दस हजार बढी मत ल्याएर विजयी हुन्छु । हिजो पनि जनकपुरधाम उपमहानगरपालिका साइकलको थियो, आज पनि साइकलको छ ।