नेकपा (एमाले)का तर्फबाट काठमाडौंको गोकर्णेश्वर नगरपालिकाको  प्रमुख पदका उमेदवार हुन्, उद्धव विष्ट । २०७४ सालको स्थानीय तह निर्वाचनमा गोकर्णेश्वरमा एमाले पराजित भएको थियो ।

विष्ट अहिले भने जित्ने दाबी गरिरहेका छन्, त्यो पनि चार हजार मतान्तरले । आफूले जिते भ्रष्टाचारमुक्त नगर बनाउने बताइरहेका उनै विष्टसँग बाह्रखरीका कुञ्जरमणि भट्टराईले गरेको कुराकानीको सम्पादित अंश :
 
अघिल्लो निर्वाचनमा प्रमुख पदमा एमाले हजारभन्दा बढी मतान्तरले पराजित भएको थियो । अहिलेको निर्वाचनमा के होला ? 

नेपाली कांग्रेसले घोषणापत्रमा गोकर्णेश्वर नगरपालिकामा गौरवको योजना घोषणा गरेको थियो । त्यसमध्ये नगरको प्रशासनिक भवनसमेत सुरुवात गर्न सकेन । जनताबाट व्यापक रूपमा कर उठाउने र त्यो रकम कार्यकर्ता पोस्ने, भ्रमण, विविध नाममा भोजभतेरमा सिध्यायो । हिजो आफैँले घोषणा गरेका गौरवका योजना नै सुरु नगरेकाले जनताले कांग्रेस बोल्छ, काम गर्दैन् भन्ने निष्कर्ष निकालेका छन् ।

जनताको बुझाइमा काम गर्ने पार्टी एमाले हो । हामी हिजोका गल्ती दोहोर्‍याउँदैनौँ, एमालेलाई जिताएर नगरको विकास चाहन्छौँ भनेका छन् । अहिलेसम्मको स्थितिमा कांग्रेसभन्दा चार हजार बढी मतान्तरले निर्वाचित हुनेमा ढुक्क छु ।

अघिल्लो निर्वाचनमा पार्टी सिंगो थियो । अहिले विभाजित भएको छ ।  धेरै मत आउँछ ? 

अदालतले जुन बेला एमाले र माओवादी फरक–फरक दल हुने गरी फैसला गर्‍यो, त्यसपछि हिजो माओवादीमा रहेका साथीहरू एमालेमा नै हुनुहुन्छ । ०७४ सालको चुनावमा एमाले र माओवादी छुट्टाछुट्टै चुनाव लडिरहेको थियो । एमालेका केही व्यक्ति मात्रै पार्टीमा हुनु हुन्न । पार्टी विभाजनको असर छैन । कांग्रेससँगको मतान्तर चार हजार हुने देखेको छु । अरू पार्टीको चुनौती छैन ।

तपाईंलाई नै जनताले भोट दिने आधार के हो ?

नेकपा (एमाले)ले चुनाव हारेपछि पनि जनताको काम नगरेको भन्ने छैन । हामीले जित–हार जे भए पनि जनताको र विकासको पक्षमा काम गरिरहेका छौँ । नगरपालिको सुशासनका लागि, भ्रष्टाचाररहित नगरपालिका बनाउन, नगरबाट पाउने सेवा सुविधा सहज ढंगले पाउनका लागि जनताको मत दिन अपरिहार्य छ ।

मेयरमा जित्नुभयो भने पहिलो के काम गर्नुहुन्छ ?

पहिलो कुरा त मैले प्रशासन नै सुधार्नुपर्छ । प्रशासनमा रहेको विकृति, विसंगति हटाउनुपर्छ । त्यहाँ रहेको भ्रष्टाचारलाई निर्मुल पार्नुपर्छ । त्यहाँ जनता जतिसुकै बेला आए पनि सिस्टमले काम गर्ने व्यवस्था मिलाउनुपर्छ । कसैको सोर्स, फोर्सविनै कानुनले दिएको स्थानीय तहका अधिकार जनताले सहजै पाउने वातावरण बनाउँछौँ ।

अरू प्राथमिकतामा के–के छन् ? 

दोस्रो, प्रशासन भवन बनाउनुपर्नेछ । तेस्रो, फोहोरमैला यहाँको समस्याका रूपमा छ । त्यसलाई वैज्ञानिक ढंगले व्यवस्थापन गर्नेछौँ । खानेपानी, शिक्षा, खेलकुद, स्वास्थ्य क्षेत्रमा गर्नुपर्ने काम धेरै छन् । भन्नुभन्दा पनि गरेर देखाउँछु । निर्वाचित भएर आएपछि नगरपालिकामा भएका विशेषज्ञ, सबै पार्टीका साथीहरू, बुद्धिजीवीलाई राखेर प्लानिङसहित सबैको साझा व्यक्ति भएर काम गर्न चाहन्छु ।

फोहोरमैला व्यवस्थापन गर्छु भन्नुभयो । कसरी, योजना के छ ?

अहिले ठेकदारी प्रथाबाट फोहोर उठिरहेको छ । जुनसुकै समयमा फोहोरमैला उठाउने, गाडी दौडिरहेको देखिन्छ । हामीले जिते स्कुल र अफिस टाइमभन्दा पछि राति १० बजेपछि फोहोर उठाउने व्यवस्था गर्नेछौँ । काठमाडौं महानगरपालिका र सरकारसँग समन्वय गरेर आधुनिक प्रविधिलाई जोडेर सुन्दर, सफा नगरपालिका बनाउनेछौँ ।

नेताहरू चुनावका बेला भाषण गर्छन्, जितेर गएपछि काम गर्दैनन् भन्ने सुनिन्छ नि !

राम्रो र नराम्रो आचारण भएका मानिस सबै पार्टीमा छन् । राम्रो कामको प्रचार नगर्ने र नराम्रो कामको प्रचार गर्ने ट्रेन्ड नै छ ।

नराम्रो काम गर्नेहरूले यो व्यवस्थाप्रति नै वितृष्णा फैलाउने काम गरेको देखिन्छ । प्रजातन्त्रको विकल्प प्रजातन्त्रै हो । यहाँ जनातले तिरेको पैसा केका लागि खर्च भइरहेको छ भनेर देखाउन सक्नुपर्छ । जनतालाई कर लगाउँदा, फरफारक गर्दा वार्षिक कति खर्च भयो, के विषयमा कति कर उठ्यो भनेर सबै पारदर्शी ढंगले काम गरेमा जनताको आकर्षण बढ्छ ।

निर्वाचित भएपछि सेवक नभएर शासकका रूपमा प्रस्तुत हुँदा जनतामा वितृष्णा भएकाले प्रश्न उठेको हो । मैले जिते यस्ता भ्रम चिरेर जनताको अपनत्व हुने गरी काम गर्छु ।

बितेको कार्यकालमा गोकर्णेश्वर नगरपालिकामा भएका कामको कसरी मूल्यांकन गर्नुहुन्छ ? 

केही काम नै भएको छैन । उहाँहरूको घोषणापत्रमा प्रशासनिक भवन, वाग्मतीमा ड्याम थुनेर स्ट्रिमर चलाउने, तारेभिरमा बुद्ध र शिवको ठूलो मूर्ति बनाउने, जगडोलदेखि शिवपुरीमाथिसम्म केबलकार चलाउने भन्नुभएको थियो । त्यो कुनै पनि सुरु गर्नुभएको छैन । मैले आरोप लगाएको होइन । वास्तविकता यही हो ।

तपाईंका पनि त्यस्ता योजना होलान् नि ?

हाम्रो त्यस्ता ठूला खालका योजना छैनन् । सामान्य योजना छन् । उज्यालो नगरपालिका बनाउने, भ्रष्टाचाररहित नगर बनाउने, नगरका विकृति हटाउने, समयानुकूल, आवश्यकताअनुसारको कुराहरू बुद्धिजीवीहरूसँगको छलफलमा मास्टर प्लान बनाएर अघि बढ्छौँ ।

भोलि तपाईंमाथि नै भ्रष्टाचारको आरोप लाग्यो भने ! 

त्यस्तो हुँदैन । मैले राजनीति सुरु गरेको ३५ वर्ष भयो । यदि, कानुनी रूपमा भ्रष्टाचार गरेको प्रमाणित भयो भने राजनीतिबाटै सन्न्यास लिन्छु ।