२०७४ सालको स्थानीय तह निर्वाचनमा काठमाडौंको दक्षिणकाली नगारपालिकामा नेकपा (एमाले)ले थोरै मतान्तरले नगर प्रमुख पदमा पराजय भोगेको थियो । पार्टीबाट प्रमुखका उमेदवार शशी शर्मा अर्याल नेपाली कांग्रेसका उमेदवार मोहन बस्नेतसँग ४३० मतले पराजित भएका थिए । नगर उपप्रमुखतर्फ पनि एमाले ४१९ मतले पराजित भएको थियो ।

यही वैशाख ३० गते हुने स्थानीय तह निर्वाचनमा एमालेले कांग्रेससहित सत्ता गठबन्धनका दलहरूको एक्लै सामना गर्दै छ । एमालेले उमेदवार फेरेको छ । अर्यालको ठाउँमा श्रीराम आचार्य उमेदवार छन् । अघिल्लोपटक कांग्रेससँग हारेको एमाले योपटक नयाँ उमेदवारसहित गठबन्धनलाई नै हराउने दाबी गरिरहेको छ । प्रस्तुत छ, उनै आचार्यसँग बाह्रखरीका रोमन आचार्यले गरेको कुराकानीको सम्पादित अंश :

अघिल्लोपटक एमालेले थोरै मतान्तरले नगर प्रमुख र उपप्रमुख गुमाएको थियो । योपटक तपाईं उमेदवार बन्नुभएको छ । जित्ने सम्भावना कति छ ? 

पाँच वर्षअघि कांग्रेसले ४३० मतले मात्र जितेको हो । त्यो भनेको साढे २०० मतको मात्र खेल हो । अहिले गठबन्धन उनीहरूले गरिरहेका छन् । नेकपा (एमाले) एक्लो, उनीहरू पाँचवटा शक्ति एक छन् ।

कागजी कुरा हेर्दा त हामीले उमेदवारी नदिँदा पनि हुन्छ होला नि हैन ! तर, अवस्था त्यस्तो हैन । नेकपा (एमाले) विगतमा नतिजा हेर्दा पनि अरू पार्टीभन्दा हाम्रो जनमत बढी नै हो । अहिले पनि अवस्थामा खास फरक छैन । मैले जित्ने आधार भनेको पनि जनताको अभिमत हो । अहिलेसम्म मलाई गरेको भरोसा हो । पार्टीले मात्र होइन, यहाँका राजनीतिक दलहरू नेपाली कांग्रेस, माओवादी केन्द्र, राप्रपालगायत पार्टीहरूका साथीहरूले पनि मलाई पत्याउनुभएको छ ।

परमादेशबाट बनेको सरकार जोगाउन गठबन्धनको नाममा आफ्ना कार्यकार्ताहरूमाथि जुन खेलबाड गर्नुभएको छ, त्यसले अवसर आए कुनै पदमा बसेर जनताको सेवा गरौँला भन्ने सपना पालेर बस्नुभएका कार्यकर्ताहरूको भावनामा चोट पुर्‍याएको छ । त्यो प्रतिशोधको मल्हम लगाउने एमाले हो, म नै हुँ । तलका कार्यकर्ताहरूको भावना नसमेट्दा के हुन्छ भनेर माथिकालाई सबक सिकाउन पनि अन्य दलका साथीहरूले मलाई मत हाल्नुुहुन्छ ।

तर, गठबन्धनका कारण एमालेलाई अर्थात् तपाईंहरूलाई चुनौती पक्कै छ हैन र ? 

मैले यसलाई बिलकुलै चुनौती ठानेकै छैन । सरसर्ती हेर्दा चुनौती देखिन्छ, तर सँगै हामीलाई ठूलो अवसर पनि छ । म त अझ चुनौतीसँग रमाउने मान्छे हो । तर, गठबन्धनलाई मैले बिलकुलै चुनौती ठानेकै छैन ।

गठबन्धन एक ढिक्का भए पो चुनाव जित्नु ! माओवादी नै एक छैन । माओवादीको एक–दुई शक्ति हामीसँग जोडिनुभएको छ । उहाँहरूसँग भएको त माओवादीको एउटा ध्रुव न हो । कांग्रेसका लामो समय त्याग गर्नुभएका, संघर्ष गर्नुभएका साथीहरू उमेदवार बन्न पाउनुभएको छैन । गठबन्धनको नाममा भद्रगोल भएको छ । यतिले मात्र जित्ने पनि हैन ।

आम नागरिक र कुनै पनि राजनीतिक दलमा आस्था राख्ने साथीहरू जसले दक्षिणकालीको मुहार फेर्न चाहनुहुन्छ, रूपान्तरण चाहनुहुन्छ, समृद्धि र विकास चाहनुहुन्छ, उहाँहरूले अहिले मात्र हैन, हिजैदेखि मलाई पत्याउनुभएको छ । दक्षिणकाली नगरपालिका भएर बीचमा खोसिएको थियो । हामीले राज्य पुनर्संरचना हुँदा यसलाई नगरपालिकाको रूपमा फिर्ता गराउन सफल भयौँ ।

तपाईंकै पार्टी एमाले पनि विभाजन भएको छ । यसको असर त स्वाभाविक रूपमा पर्छ नि हैन ? 

यो तर्क स्वाभाविक हो । पार्टी विभाजन हुनु अवश्य पनि राम्रो होइन । तर, नेकपा (एमाले) कार्यकर्ताको कारणले विभाजन भएको पनि हैन ।

प्रचण्ड र माधव नेपालको गुटगत स्वार्थ र आरिसले पार्टी विभाजन भएको हो । पार्टी अध्यक्ष केपी शर्मा ओलीको देशभर ‘केपी बा’ का रूपमा उदाएको क्रेजलाई पचाउन नसकेर उनीहरूले पार्टी विभाजन गरे । अवसरका भकारीहरूले हाम्रो पालो नआउने भयो भनेर बूढानीलकण्ठमा शेरबहादुर देउवको पाउमा गएर लम्पसार परेर पार्टी विभाजन भएको हो ।

तपाईंकै मिडियाबाट घोषणा गरौँ कि त्यो नेकपा (एकीकृत समाजवादी) भन्ने पार्टीको संगठन नै छैन । त्यसको एउटा छाया पनि हाम्रो नगरपालिकामा छैन । सम्पूर्ण जनप्रतिनिधिहरू एक ढिक्का हुनुुहुन्छ । वडादेखि केन्द्रसम्म रहेका कमरेडहरू पार्टीमा एकढिक्का हुनुहुन्छ । टिकट फाइनल मेरो भएर आएपछि अहिले पार्टीबाटै मेयरका आकांक्षी साथीहरू मसँगै घरदैलोमा हुनुहुन्छ र चुनावी मोर्चा उहाँहरूले नै हाँक्नुभएको छ । उपप्रमुखतर्फ पनि अवस्था उस्तै छ । यो एकता देखेर त्यो ‘एस’ भन्ने र गठबन्धन दलको सातो उडेको छ । नेकपा (एमाले) सिंगो, सबल र प्रबल छ । मेरो जितको आधार नै यही हो ।

०७४ को स्थानीय निर्वाचनमा अन्तिम समयमा टिकट पाउनु भएन । अहिले उमेदवार हुनुहुन्छ । तपाईंलाई जनताले पत्याउनुपर्ने कारण के छन् ? 

अघिल्लोपटक पनि एक हद टिकट फाइनल भएकै हो । तर, पार्टीभित्र गुट–उपगुटको सिकार बन्दा मेरो टिकट खोसियो । त्यति बेला दक्षिणकालीका जनताले मलाई यहाँको संस्थापक मेयरको जिम्मेवारी दिन चाहनुभएको थियो । अहिले पार्टीका साथीहरूले पनि जनताले रूचाएका पात्रलाई चुनाव लड्नबाट वञ्चित गर्दा नतिजा नआएको स्वीकार गर्नुभएको छ ।

नगरपालिका पुनर्स्थापित गराउने कार्यमा मैले सबै दलका नेताहरूमाझ पुगेर गरेको प्रयासलाई जनताले नजिकबाट हेर्नुभएको छ । नगर प्रमुख बनाउन सक्यो भने हाम्रो घरदैलोमा अनेकन् काम गर्छ भन्ने बुझाइ जनतामा छ । अरू राजनीतिक दलमा भोट हाल्ने साथीहरूले पनि एकपटक मेरो नेतृत्व चाहनुभएको छ ।

मैले यहाँका जनता र मेरो पार्टीका नेताहरूलाई पनि बाचा गरेको छु । पार्टी अध्यक्ष केपी शर्मा ओलीलाई समेत भेटेर म जितेर आर्शीवाद थाप्न आउनेछु भनेको छु । विपक्षीहरू मेरो उमेदवारी देखेर आत्तिएका छन् । सबै दललाई अटाउने र घुलमिल भएर काम गर्ने क्षमता मसँग छ । घरदैलोमा पुग्दा जनताले देखाएको सद्भाव र माया देखेर पार्टीले पनि टिकट दिएर सही निर्णय गरेछौँ भन्ने निचोडमा पुगेको छ ।

नगरवासीका लागि तपाईंको योजना के हो ? 

यो दक्षिणकाली भनेको नामभित्रै पहिचान बोकेको नगर हो । यो धार्मिक र पर्यटकीय क्षेत्र हो । हामी प्राकृतिक रूपले सम्पन्न छौँ । हरेक डाँडाले काठमाडौंको सुन्दर दृश्य देखाउँछ । फूलचोकी डाँडा, ऐतिहासिक पोखरी, हात्तीवनको डाँडा, चम्पादेवी, भालुखोपको डाँडालगायत हाम्रा शिर हुन् । यहाँबाट पर्यटन क्षेत्रमा विकास गर्न सक्छौँ । होमस्टे चलाउन सक्छौँ । युवालाई रोजगारी दिन, पूर्वाधारको विकास गर्न पनि असहज छैन ।

यो आफैँमा पर्यटकीय क्षेत्रका रूपमा प्रख्यात छ । आन्तरिक र बाह्य पर्यटकको आवागमन बढाउन सके नगरको कायापलट हुन समय लाग्दैन । कृषि, स्वास्थ्य, शिक्षा र यातायातलगायत विकासका आधारभूत विषयले पूर्णता पाउँदै गएको छ ।

यहाँको विशेष सम्भावना भनेको मदनभण्डारी मार्ग हो, जसले काठमाडौं र हेटौँडालाई जोड्छ । तराईसँग जोड्ने फास्ट ट्रयाक हाम्रै नगरपालिकाको फेदीबाट गइरहेको छ । यी यावत् कारणले हाम्रो नगरको भविष्य सुन्दर छ, उज्ज्वल छ । तर, कर्मयोगी मान्छेको अभाव छ ।

अन्त्यमा, तपाईंले जित्नुभयो भने पाँच वर्षमा नगरभित्र कस्ता काम हुन्छन् ? पर्यटन, कृषि, शिक्षा, स्वास्थ्य, घरेलु उद्योग, प्राकृतिक सम्पदालगायत सबैलाई विकासमा लगाउँछु । विकासलाई जनतासँग जोड्ने प्राथमिकता मेरो छ । फर्पिङ नासपातीको पकेट क्षेत्र हो । यहाँ अर्ग्यानिक तरकारीको पकेट क्षेत्र पनि छ । यहाँ अवस्थाअनुसार पकेट क्षेत्र घोषणा गरेर म काम अघि बढाउनेछु । अघि नै भनेका डाँडाहरूमा पर्यटकीय विकास गर्ने हो । एक घर एक होमस्टे अवधारणाअनुसार काम अघि बढाउने हो । कोर सहरबाट मानिसलाई आनन्दमय वातावरणमा समय व्यतीत गर्ने स्थल बनाउने हो । सहरको सुन्दरतालाई बचाउने हो । अर्ग्यानिक खानेकुराको प्रवर्द्धन अर्को मेरो उद्देश्य हो ।