०७४ को स्थानीय तह निर्वाचनमा ३२६ मतान्तरले पराजित भएका हरिकृष्ण ब्यञ्जनकार यसपटक पनि नेकपा एमालेका तर्फबाट ललितपुर महानगरपालिकाको मेयर पदका उमेदवार बनेका छन् । यस पटकको निर्वाचनमा उनी अघिल्लो निर्वाचनको मतान्तर पुर्दै विजय हासिल गर्ने योजनामा छन् । तर, अघिल्लो पटक कांग्रेसकातर्फबाट उमेदवार भएर निर्वाचित भएका चिरिबाबु महर्जनसँगै उनको प्रतिष्पर्धा हुँदै छ । महर्जन हाल कांग्रेसका तर्फबाट सत्ता गठबन्धनका उमेदवार छन् । निर्वाचनमा पाँच दलीय गठबन्धन भए पनि चुनौती नरहेको र आफू पाँच हजार मतान्तरले विजयी हुनेमा ढुक्क रहेको ब्यञ्जनकार बताउँछन् । उनै ब्यञ्जनकारसँग बाह्रखरीका कुञ्जरमणि भट्टराईले आसन्न स्थानीय निकायको निर्वाचनसँग सम्बन्धित रहेर गरेको कुराकानीको सम्पादित अंश :
 

अघिल्लो निर्वाचनमा पराजित भए पनि एमालेले तपाईंलाई नै उमेदवार बनायो । पार्टीले अरु नेता नपाएको हो कि अरु नै कारण छन् ?

अघिल्लो निर्वाचन मैले जितेको नै हो । कर्मचारीहरूले मत गणनामा त्यतिबेला मलाई हराइदिए । त्यसको प्रमाण मसँग छ । र, त्यो सर्वोच्च अदालतमा पेश पनि गरेको थिएँ । त्यतिबेला हाम्रो पनि गल्ति भएको थियो । विगतका गल्तिलाई सच्याएका छौं ।

हाम्रो पार्टीमा थुप्रै नेताहरु हुनुहुन्छ । नेताहरू नभएको भने होइन । तर, म महानगरमा धेरै काम गरेको मान्छे हुँ । हरिकृष्ण भिजन भएको मान्छे हो, अघिल्लो पटक पारजित भए पनि यो पटक काम गर्न दिनुपर्छ भन्ने साथीहरूको कुरा रह्यो । त्यसैले पार्टीको महानगर, जिल्ला कमिटीको सिफारिसमा केन्द्रले मलाई नै उमेदवार बनाउने निर्णय गर्यो ।
 
अघिल्लो निर्वाचनमा पार्टीहरु छुट्टाछुट्टै निर्वाचनमा गएका थिए । अहिले पाँच दलीय गठबन्धन छ । चुनौती कतिको छ ?

०७४ को निर्वाचनमा छुट्टा–छुट्टै उमेदवार भए पनि पनि कांग्रेस र माओवादी मिलेकै थिए । अहिले गठबन्धन–गठबन्धन भनिरहेका छन् । पाँच दल मात्रै होइन त्यसमा अरु मिसिएर आए पनि हामी एक्लै सामना गर्न तयार छौँ । उनीहरु कमजोर छन् ।

फौजको सहारा लिएर अघि बढ्न खोजिरहेका छन् । कांग्रेसका सभापति शेरबहादुर देउवालेसमेत एमालेसँग एक्लै लड्न सकिँदैन भनिसकेका छन् । कमजोरहरू मिलेर आउँछन् । हामी बलिया छौं । हामी सिंह हौँ । उनीहरूलाई ५–६ हजारको मतान्तरले हराउँछु ।  

ललितपुरबासीले तपाईं नै भोट किन गर्ने ? 
मसँग समृद्ध महानगर बनाउने भिजन छ । पहिले पनि जनताले त्यही अनुसार भोट दिएका हुन् । अहिले पनि दिन्छन् । पहिले जितेर पनि हारियो । अहिले ५–६ हजार मतान्तरले जित्नेमा ढुक्क छु ।
 
निर्वाचन आउन १४ दिन मात्रै बाँकी छ । कसरी तयारी  गरिरहनुभएको छ ? 

प्रत्येक वडामा हाम्रो संगठन छ । हाम्रा कार्यकर्ता छन् । प्रत्येक वडामा हाम्रा समर्थक तथा सुभेच्छुक छन् । एउटा फोनको भरमा म्यासेज पुगिरहेको छ । यो प्रविधिको जमाना हो । त्यसले पनि प्रचार–प्रसार गर्न सहज छ । प्रत्येक वडामा सम्पर्क कार्यालय खोलिसक्यौं । अहिले जनताको माग सुन्ने काम भइरहेको छ । आ–आफ्ना वडामा उमेदवारले घर दैलो गरिरहनुभएको छ । मेयरकै हिसाबले भने आजबाट घरदैलो सुरु गरेको छु ।  

घरदैलोमा पुग्दा मतदाताको प्रतिक्रिया कस्तो छ ? 

मतदाताले तपाईंको पोजिसन राम्रो छ । पहिले हामीबाट पनि केही कमजोरी भयो । तपाईंबाट पनि केही कमजोरी रह्यो । अब त्यो अवस्था आउँदैन । ललितपुर बनाउन तपाईं नै चाहिन्छ भनेर मतदाताले भनिरहनुभएको छ । 

निर्वाचित भएको अवस्थामा के गर्नुहुन्छ ? 

हामी ललितपुरलाई सांस्कृतिक महानगर बनाउन चाहन्छौँ । ललितपुरलाई समृद्ध बनाउन चाहन्छौं । हाम्रो मुख्य भिजन त्यही हो । त्यसका लागि शिक्षा, स्वास्थ्य, सामाजिक शिक्षा, भौतिक पूर्वाधारमा उपलब्धि हुनुपर्छ । यी कुराहरूमा उपलब्धि गर्दै जान्छौं । हामीसँग भिजन छ । त्यही अनुसार काम गर्नेछु ।