काठमाडौं । कतार विश्वकपको तयारीका लागि ब्राजिलले जापानसँग मैत्रीपूर्ण खेल खेल्ने भएको छ । ब्राजिल फुटबल संघले बुधबार विज्ञप्ति जारी गर्दै जापानविरुद्ध आउँदो जुन ६ मा मैत्रीपूर्ण खेल खेल्ने जनाएको हो ।

ब्राजिल र जापानबीचको खेल टोकियोमा हुनेछ । त्यसको पाँच दिनपछि ब्राजिलले छिमेकी प्रतिद्वन्द्वी अर्जेन्टिनाविरुद्ध मेलबर्नमा मैत्रीपूर्ण खेल खेल्नेछ ।

कतार विश्वकप २०२२ मा ब्राजिल समूह ‘जी’मा छ । ब्राजिलले समूह चरणमा सर्बिया, स्विट्जरल्यान्ड र क्यारुनविरुद्ध प्रतिस्पर्धा गर्नेछ ।

त्यसअघि, ब्राजिल र अर्जेन्टिनाबीचको विश्वकप छनोट खेल हुने/नहुने अझै टुंगो लागेको छैन । अर्जेन्टिनाका खेलाडीले कोभिड–१९ प्रोटोकल पालाना नगरेको भन्दै ब्राजिलविरुद्धको खेल बीचमै रद्द भएको थियो । गएको सेप्टेम्बरमा खेल सुरु भएपछि फुटबल अधिकारी मैदानमै छिरेर खेल रोकेका थिए ।

ब्राजिल र अर्जेन्टिना दुवैले उक्त खेल पुनः खेल्न चासो दिएका छैनन् ।