जनकपुरधाम । आसन्न स्थानीय तहको निर्वाचन नजिकएको छ । दलहरु उमेदवार छनोट प्रकृयाको अन्तिम चरणमा छन् । मधेस प्रदेशको राजधानी जनकपुरधाम उपमहानगरपालिकामा सत्तारुढ दलले साझा उमेदवार उठाउने सहमति गरिसकेका छन् । जनता समाजवादी पार्टी (जसपा)ले नगर प्रमुख र नेपाली कांग्रेसले उपप्रमुख पाउने गरी शीर्ष नेताहरुले चुनावी तालमेल गरेका छन् । 

यद्यपि, यी दुबै दलले उमेदवार तय अझै गर्न सकेका छैनन् । कांग्रेसमा केही असंतुष्टि पनि देखिएको छ । प्रतिस्पक्षी दलले उमेदवारको नाम सिफारिस गरिसकेका छन् । लोकतान्त्रिक समाजवादी पार्टी (लोसपा)ले प्रदेश सांसद परमेश्वर साहसहित पाँचजनाको नाम सिफारिस गरेको छ ।  नेकपा एमालले एकल नाम व्यवसायी शिव शंकर साह (हिरा)को नाम सिफारिस गरेको छ । 
 
सत्तारुढ दलबीच चुनावी तालमेल भएपछि धरै आकांक्षी आन्तिरक रुपमा टिकटका लागि लविङमा छन् । सत्तारुढ दलबाट सांसदहरु पनि उमेदवार बन्ने रुचि देखाइरहेका छन् । जसपाले पाएको मेयरमा प्रदेशसभा सदस्य रामआशिष यादवले पनि उमेदवार बन्ने चाहना देखाएका छन् । पार्टीले जिमेवारी दिए निर्वाह गर्न तयार रहेको सांसद यादवले बताए । “पार्टीले जिमेवारी दिए निर्वाह गर्न तयार छु,” उनले भने, “साथीहरुले पनि त्यही आधारमा कुरा गरिरहेका छन् । मलाई उमेदवार बनाउन पार्टीको स्थानीय नेता तथा कार्यकर्ताको पनि दबाब छ ।” 

तत्कालीन संघीय समाजवादी फोरमबाट ०७४ सालमा पनि आफूलाई जनकपुरको मेयरमा उठ्न दबाब दिइएको उनले स्मरण गरे । तर, यसपटक नर्कान नसक्ने अवस्था रहेको उनी बताउँछन् । यद्यपि, पार्टीबाट निकै अकांक्षी रहेकाले स्थानीय चुनावमा नआउने प्रयास गर्ने उनको भनाइ छ । 

सत्तारुढ दलले चुनावी तालमेल गरेपछि प्रतिपक्षी दल पनि गठबन्धन गर्ने तयारीमा छन् । लोसपाले एमाले र नयाँ राप्रपासँग तालमेल गर्ने बताइएको छ । लोसपाले चुनावी तालमेल गरी अगाडि बढे सांसद साहले टिकट पाउने सम्भावना बढ्नेछ । जनता र पार्टीभित्र नेता तथा कार्यकर्ताको दबाबको कारण मेयरमा चुनाव लड्न खोजेको उनको भनाइ छ । पार्टीलाई मजबुत बनाउन पनि आफ्नो उमेदवारी आवश्यक रहेको उनी बताउँछन् । पार्टीले टिकट पक्का गरेपछि सांसद पदबाट राजीनमा दिएर चुनावी प्रचारप्रसार लाग्ने उनले बताए । 

दुबै सांसद पार्टीबाट बलियो उमेदवार हुन् । पार्टीले अवसर दिए जित्ने उनीहरुको विश्वास छ । लोसपाबाट मेयरका लागि सिफारिस भएका जानकी राम साहले पार्टी परित्याग गरिसकेका छन् । जनकपुरधाम उपमहानगरपालिका ७ का वडाध्यक्षसमेत रहेका साह लोसपाबाट टिकट पाउने सम्भावना नदेखेपछि उनी एमालेमा प्रवेश गरेका छन् । एमालेबाट टिकट पाउने उनको पनि सम्भावना छ । स्वतन्त्र उमेदवार बलराम महतो चुनावी प्रचार प्रसार तिब्र रुपमा गरिरहेका छन् । 

कांग्रेसमा विद्रोहः राजीनामा दिने तयारी
शिर्ष नेताहरुले गरेको चुनावी तालमेल स्थानीय नेताहरुले नमान्ने अडान लिएका छन् । कांग्रेसले मतको अधारमा सबैभन्दा बलियो पार्टी भए पनि उपप्रमुखमा सहमति जनाउने कदम गलत रहेको नगर उपसभापति राकेश विक्रम साहले बताए । ०७४ को चुनावमा तत्कालीन राजपा पहिलो र कांग्रेस दोस्रो पार्टी बनेको थियो । नगर कमिटिले नगर प्रमुख र उपप्रमुख पदका लागि अकांक्षीको नाम सिफारिस गर्ने दिन नै सत्तारुढ दलबीच सहमति भएको थियो । आज केही विद्रोही नेताहरु संयुक्त राजीनामा दिने तयारीमा छन् ।