काठमाडौं । मोहन लिम्बुको हत्याका 'मुख्य योजनाकार' भनिएका अनिलकुमार मण्डलले ललितपुरमा घर नै भाडामा लिएर 'हत्या गरेको' खुलेको छ । अनुसन्धानका क्रममा गोदामका लागि भनेर मासिक ३० हजार रुपैयाँ भाडा बुझाउनेगरी घर भाडामा लिएर 'हत्याको योजना बनाएको' प्रहरीले जनाएको छ ।

प्रहरीले बिहीबार गोदावरी नगरपालिका १२ थेंचो चरङ्गखेलस्थित गोदामघर रहेको कम्पाउन्डमा गाडिएको अवस्थामा लिम्बुको शव फेला पारेको थियो ।

करिब पाँच फिट गहिरो खाल्डोमा गाडिएको अवस्थामा शव फेला परेको थियो । शवलाई गलाउन नुनको प्रयोग गरेको पाइएको प्रहरी बताउँछ ।

मोरङको धनपालथान गाउँपालिका २ को उखुबारीमा यही माघ १३ र १४ गते राजेन्द्र कुमार श्रेष्ठ र शम्भु कुमार चौधरीको शव गाडिएको अवस्थामा भेटिएको थियो । उनीहरूको हत्या माघ पुस ५ गते ७ गते भएको खुलेको प्रहरीले जनाएको छ ।

सो घटनाको अनुसन्धानका क्रममा अपराध अनुसन्धान महाशाखाले मण्डललाई काठमाडौंबाट पक्राउ गरी बयान लिएको थियो ।

प्रहरीकाअनुसार बयानका क्रममा मण्डलले ललितपुरमा पनि एक जनाको शव गाडेको बताएका थिए । ललितपुर प्रहरीका प्रवक्ता सिद्धिविक्रम शाहकाअनुसार लिम्बुको हत्या गत मंसिर २८ गते भएको थियो । उनको हत्या गर्न मण्डलले एउटा घर नै भाडामा लिएको उनी बताउँछन् । 

‘‘लिम्बुको हत्या हुनुअघि गोदामका लागि भन्दै घर नै भाडामा लिइएको रहेछ । मासिक ३० हजार रुपैयाँ भाडा तिर्ने गरी भाडामा लिएका रहेछन् । लिम्बुको हत्या हुनेभन्दा करिब तीन महिनाअघि गोदामका लागि भन्दै घर भाडामा लिएका थिए,” शाहले भने ।

मण्डलले डोरीले घाँटी कसेर मारेको प्रहरी प्रवक्ता शाहले बताए । शव घरकै कम्पाउन्डमा खाल्डो खनेर गाडिएको अवस्थामा फेला पर्‍यो । 

• हातको राखीले पहिचान भएको थियो शव

प्रहरीकाअनुसार सुरुमा मण्डलले घरभित्रै खाल्डो खनेर गाड्ने प्रयास गरेका थिए । तर, घरभित्रको सिमेन्ट ढलान फोड्न नसकेपछि उनले गोदामघर पछाडिको कम्पाउन्डमा शव गाडेको प्रहरी बताउँछ । प्रहरीकाअनुसार शव गाडेपछि उनले माथिबाट सिमेन्टले ढलान गरिदिएका थिए ।

मोरङको उखुबारीमा दुईजनाको शव फेला पारेपछि मण्डललाई काठमाडौंबाट पक्राउ गरिएको थियो ।

जिल्ला प्रहरी कार्यालय मोरङका एसपी जनार्दन जीसी कारोबार रकम एकलौटी बनाउने उद्देश्यले तीनजनाको हत्या भएको बताउँछन् ।

मण्डलसहित पक्राउ परेका अमित भनिने दिननाथ सोनार र नासिर आलमलाई प्रहरीले आज (शुक्रबार) सार्वजनिक गरेको छ ।

‘‘सबैभन्दा पहिले लिम्बुको हत्या गरेर मोरङमा अन्य दुई जनालाई लिएर हत्या गरिएको खुलेको छ । ललितपुरमा लिम्बुको हत्या गरेर मण्डल श्रेष्ठ र चौधरीलाई लिएर मोरङ गएको पाइएको छ,” एसपी जीसीले भने ।

• ‘हाइड्रोमा लगानी गर्न पैसा उठाउँदै थिए मोरङ उखुबारीमा मृत भेटिएका व्यावसायी’

प्रहरीकाअनुसार मोरङमा दुईजनाको हत्या गर्न मण्डलले भारतीय नागरिकको सहायता लिएको आशंका छ । ती भारतीय नागरिक अहिले फरार छन् । 

प्रहरीले डोरी र गाच्छाले घाँटी कसेर योजनावद्ध तरिकाले हत्या गरिएको जनाएको छ । हत्यामा अन्य समूहको सहभागी रहेको हुन सक्नेबारे प्रहरीले अनुसन्धान गरिरहेको छ । प्रहरीले हत्यापछि खाल्डो खन्न प्रयोग गरेका एक थान कोदालो र ६ प्याकेट नुन बरामद गरेको छ । 

प्रहरीकाअनुसार चारजना मिलेर ५० करोड बराबरको जग्गा बैना गरेका थिए भने हाइड्रोपावर, सिमेन्ट उद्योग लगायतका क्षेत्रमा लगानी गर्दै आएको खुलेको छ । 

यसबारे केही कागजात फेला परेको र थप अनुसन्धान भइरहेको प्रहरीले जनाएको छ ।