जनकपुरधाम । राष्ट्रियसभा सदस्यको निर्वाचनअन्तर्गत मधेस प्रदेशमा मतदान जारी छ । मध्याह्न १२ बजेसम्म २५ प्रतिशत मतदान भइसकेको निर्वाचन कार्यालयले जनाएको छ ।

आज बिहान साढे १० बजेदेखि जनकपुरस्थित महेन्द्रनरायण निधि भवनमा मतदान सुरु भएको थियो । तीनवटा बुथमा मतदान भइरहेको छ ।

मतदाता मतदान केन्द्रमा कोरोनाविरुद्धको खोप कार्ड देखाएर भित्र प्रवेश गरिरहेका छन् । मतदान केन्द्रमा प्रवेश गर्नुअघि शरीरको तापक्रम परीक्षण गरिएको छ । मतदान केन्द्रमा स्वास्थ्यकर्मीको टोली समेत खटाइएको छ ।

मधेश प्रदेशमा दुई पदका लागि चारजनाको उमेदवारी परेको छ । सत्तारूढ पाँच दलको संयुक्त उमेदवारका रूपमा निर्मला अर्याल र खालिद् सिद्दिकी छन् । अर्याल नेकपा (माओवादी केन्द्र)का हुन् भने सिद्दिकी जनता समाजवादी पार्टी (जसपा)का हुन् ।

यस्तै, सुरुमा छुट्टाछुट्टै उमेदवारी दर्ता गराएका प्रतिपक्षी दल नेकपा (एमाले) र लोकतान्त्रिक समाजवादी पार्टी (लोसपा)ले पनि गठबन्धन गरेका छन् । यही माघ ६ गते दुवै दलका प्रदेश अध्यक्षले संयुक्त उमेदवारका रूपमा रूपा यादव र उसमान अन्सारीको नाम सार्वजनिक गरेका थिए ।

थप तस्बिर हेर्नोस्–