जनकपुरधाम । डा. सीके राउत नेतृत्वको जनमत पार्टीले गत पुस १० गते सिरहाको औरही गाउँपालिकाबाट आन्दोलन सुरु गर्‍यो । औरहीमा केही व्यक्तिले किसानका लागि राखिएको गहुँको बिउ लुटेका थिए ।

प्रहरीले चारजनाविरुद्ध मुद्दा दर्ता गरी एकजनालाई पक्राउ गरेपछि जनमत पार्टी आन्दोलित भएको थियो । त्यसयता जनमतको प्रर्दशन जारी छ ।

सोही प्रर्दशनको क्रममा सप्तरीको हनुमाननगर कंकालिनी नगरपालिका वडा नम्बर ११ का वडाध्यक्ष मोही यादवमाथि जनमतका कार्यकर्ताहरूले अभद्र व्यवहार गरे । वडाध्यक्ष यादव जसपा निकट हुन् । उनले पनि जनमतको कार्यकर्तालाई हतियार देखाएर धम्की दिएको आरोप लागेको छ ।

त्यसको दुईदिनपछि पुस १५ गते जसपाले जनमतलाई लक्षित गर्दै खबरदारी जुलुस निकाल्यो । त्यसपछि केही समय दुवै पार्टीका गतिविधि शान्त भएपनि समाजिक सञ्जालमा आरोप प्रत्यारोप चलिरह्यो ।

माघ ५ गते जसपा नेतृ एवं भौतिक पुर्वाधार तथा यातायात मन्त्री रेणु यादव बलिदानी दिवसमा सहभागी हुन रौतहट पुगिन् । जनमतको नेता तथा कार्यकर्ताले मन्त्रीको बाटो अवरुद्ध गरी प्रर्दशन गरे ।

"कोही गाडीको झण्डा तोड्न थाले त कोही जसपा कार्यकर्ताको मोटरसाइकल तोड्फोड गर्न थाले," त्यतिबेला मन्त्री यादवसँगै रहेको मधेश प्रदेशका भूमि व्यवस्था तथा कृषि राज्यमन्त्री योगेन्द्र रायले भने ।

उनकाअनुसार अर्को बाटो प्रयोग गरी मन्त्री यादव कार्यक्रम स्थलमा पुगिन् । जहाँ उनले जनमतप्रति संकेत गर्दै आक्रोशपूर्ण भाषण गरिन् । उनले डेढ दसक पुरानो 'राइस मिल' घटना दोहोर्‍याउने हिंसात्मक अभिव्यक्ति दिएकी थिइन् । त्यो अभिव्यक्तिको चौतकर्फी आलोचना भइरहेको छ ।

तर, जसपाले उक्त भाषणको बचाउ गर्दै आएका छन् । आज (सोमबार) जनकपुरमा फेरी रौतहटमा महिला मन्त्रीमाथिको हिंसात्मक आक्रमणविरुद्धको खबरदारी जुलुस निकालिएको छ । जसपानिकट महिलासंघले आयोजना गरेको खबरदारी जुलसको छानबिन गरी दोषीमाथि कारबाही हुनु पर्ने माग गरिएको छ ।

मन्त्री यादवमाथि दुर्व्यवहार भएको जसपाको दाबी छ । जनमतका कार्यकर्ताले गैरराजनीतिक कार्य गरेको उनीहरूको भनाइ छ । जुलुसमा सहभागी जसपा नेता तथा कार्यकर्ताहरूले ‘उच्छृङ्ख गतिविधि गर्न पाइँदैन, किसानको नाममा घुसपैठ बन्द गर, सीके गुण्डा देश छोड र महिलालाई सम्मान गर' लगायतका नारा लगाएर प्रदर्शन गरे ।

अहिले दुवै दल निर्वाचनलाई लक्षित गरी आफ्नो अभ्यास गरिरहेको जानकारहरूको बुझाइ छ । सत्तारूढ अन्य दल यो बीच मौन देखिएपनि सामाजिक सञ्जालमा एक छन् भने प्रतिपक्षी दल एक कित्तामा उभिएका छन् । प्रमुख प्रतिपक्षी दल नेकपा एमालेकै इसारामा जनमतले जसपालक्षित प्रर्दशन गरिरहेको सत्तापक्षका नेताहरूको टिप्पणी छ । जनमतको आन्दोलनलाई लोकतान्त्रिक समाजवादी पार्टी (लोसपा) नेपाल र एमालेको सर्मथन रहेको सत्तापक्षको बुझाइ छ ।