दाङ । ०७८ साउन १ गते दाङका तत्कालीन प्रमुख जिल्ला अधिकारी रामबहादुर कुरुम्बाङले फेसबुकमा निर्माण व्यवसायी द्रोण दुलालको फोटो पोस्ट गर्दै घोराही–तुलसीपुर चार लेन पक्की सडक निर्माणको काम पुनः सुरु भएको जनाएका थिए । १८ महिनाभित्र काम सकिने उनको पोस्टमा उल्लेख थियो ।

तीन महिना बित्यो उक्त सडकमा सामान्य टालटुलबाहेक परिणाम देखिने खालको केही काम भएको छैन । बरु, निर्माण गर्न भन्दै भत्काइएको सडकले दुर्घटनाको जोखिम बढेको छ ।

कुइरेपानी–घोराही–तुलसीपुर चार लेन सडक निर्माणको काम ०७८ साउन १३ गते नै सकाउनुपर्ने थियो । तर, सडकको अवस्था झन्–झन् बिग्रँदै गएको छ । तुलसीपुरदेखि घोराहीसम्म मात्रै अहिले ठूला–साना करिब १९३ बढी खाल्टाखुल्टी परेका छन् । कालोपत्र उप्किएको छ । धुलो, हिलो त छँदै छ । दुर्घटनाको जोखिम ह्वात्तै बढेको छ ।

खाल्टाखुल्टीमा दुर्घटनामा परेर तुलसीपुर उपमहानगरपालिका–१०, राइखलियानका ३५ वर्षीय चूडामणि भण्डारी र घोराही उपमहानगरपालिका–३ का ४३ वर्षीय खुसीराम चौधरीले त ज्यानै गुमाए । घाइते, अंगभंग हुने दुर्घटना दिनहुँजसो भइरहेका छन् ।

वरपरको भाग खन्दै सडक झन् साँघुरो बनाएर छोडिएको पनि लामो समय भयो । त्यसमाथि ठाउँ–ठाउँमा डाइभर्सन हालेर सडक झनै जोखिमपूर्ण बनाइएको छ । कुनै ठाउँमा आधा बाटो ढाक्ने गरी निर्माण सामग्रीहरू थुपारिएको छ । काम रोकिएको महिनौँ भयो ।

दुर्घटनापछि पुरिन्छन् खाल्टा
घोराही–१०, सौँडिकुलाचोक आसपासको सडकमा ठूला–ठूला खाल्टाखुल्टी थिए । गएको कात्तिक २७ गते राति प्रहरीका एक अधिकारी त्यही खाल्टामा मोटरसाइकल दुर्घटनामा परे । कात्तिक २८ गते बिहानै सौँडिकुला क्षेत्रका सबै खाल्टाखुल्टी पुरियो ।

यसअघि पनि तुलसीपुरको रानीघाट खोलापूर्वको खाल्टामा परेर राइखलियानका युवकको ज्यान गएको अर्को दिन उक्त खाल्टा पुरिएको थियो । घोराही–तुलसीपुर चार लेन सडकखण्डमा सयौँ खाल्टाखुल्टी छन् । खाल्टा पुरिन कि ओहोदाकै व्यक्तिहरू दुर्घटनामा पर्नुपर्छ कि त दुर्घटनामा परेर कसैको ज्यान जानुपर्छ ।

आलटाले कुरा
चार लेन सडक आयोजनाले खाल्टा पुर्ने जिम्मेवारीबारे आलटाले कुरा गरेर टार्दै आएको छ । परियोजनाका प्रमुख पारस हमाल तुलसीपुर बजारदेखि हात्तीखोवाचोक र घोराहीको कटुवाखोलादेखि डीके पेट्रोल पम्प क्षेत्रसम्मका खाल्टा डिभिजन सडकले पुर्नुपर्ने बताउँछन् ।

त्यसबाहेक उक्त सडकखण्ड निर्माणको काम चार लेनकै भएको हमालले बताए । तर, उनले दसैँ मनाउन गएका ठेकेदार र कामदार नफर्केकाले समस्या भएको जिकिर गरे ।

“फोर लेन सडक निर्माणको जिम्मा लिएको तथ्य इन्जिनियरिङको मुख्य मान्छे छठपछि आफैँ आएर काम गर्ने भनेर जानुभएको हो । त्यसैले यति बेला काम बन्द छ,” हमालले भने, “हामीले फ्लोअप गरिरहेका छौँ । अब छिट्टै उहाँहरू आउने कुरा छ । उहाँहरू आएपछि तत्काल काम सुरु हुन्छ ।”

छलफलमै छौँ : प्रजिअ
प्रमुख जिल्ला अधिकारी हिरालाल रेग्मीले यसअघि के भयो थाहा नभएको तर अब चार लेन सडक निर्माणकार्य अघि बढाउन छलफल थालिएको बताए । “निर्माण व्यवसायी, स्थानीय सरोकारवाला तथा सम्बन्धित सबैसँग छलफलको प्रक्रिया अगाडि बढाएका छौँ, प्रजिअ रेग्मीले भने, “अबको एक/दुई दिनभित्र परिणाम देखिने खालको निर्णय गरेर अगाडि बढ्छौँ ।”