केशवराज जोशी, काठमाडौं । मोरङ उर्लाबारी नगरपालिका–१ का सनक शाक्यको हत्या र साढे ३३ किलो सुन गायब प्रकरणको अन्तिम बहस सुरु भएको छ । जिल्ला अदालत मोरङमा आइतबारबाट निरन्तर हेर्दाहेर्दैमा सो बहस सुरु भएको हो ।

जिल्ला सरकारी वकिलको कार्यालय मोरङका सहायक जिल्ला न्यायाधिवक्ता सुदर्शन निरौलाले दसैंअघि नै मुद्दा टुङ्ग्याउने गरी बहस अगाडि बढेको बताए । उनका अनुसार दुवै पक्षका कानुन व्यवसायीबीचको बहस न्यायाधीश भरत लम्सालको इजलासमा भइरहेको छ ।

के हो ३८ क्विन्टल सुन तस्करी प्रकरण ?

२०७४ साल माघ ९ गते तस्करी गरेर मोरङ उर्लाबारीका गोरे भनिने चुडामणि उप्रेतीको समूहले साढे ३३ किलो सुन काठमाडौं ल्याएको थियो । सो सुन गायब भएको थियो । सो सुन त्रिभुवन अन्तर्राष्ट्रिय विमानस्थलबाट पुरानोबानेश्वरसम्म लगेर छाड्ने जिम्मा गोरे समूहले सानु वनलाई दिएको प्रहरी अनुसन्धानबाट खुलेको थियो ।

सानुको ०७४ माघ २२ गते  विमानस्थलमा गुड्दै गरेको ट्याङकको चक्कामा ठोकिएर ज्यान गएको थियो । उनले आत्महत्या गरेको बताइएको थियो । सानु थाई एयरवेजका इन्जिनियर थिए । त्यसअघि स्कुटरमा सानु वन र अर्को एकजनाले साढे ३३ किलो सुन पुरानो बानेश्वरतर्फ लग्ने क्रममा सुन लुटिएको भन्दै गोरेलाई फोन गरेका थिए ।

सानुको मृत्युपछि सुन गायब भएपछि सुन गायबमा संलग्न रहेको भन्दै गोरे समूहले करेन्ट लगाएर यातना दिँदा २०७४ साल फागुन १८ गते मोरङको उर्लाबारी नगरपालिका–१ मा शाक्यको मृत्यु भएको थियो । सनमले गोरेको आर्थिक कारोबार हेर्दै आएका थिए ।

सनमको हत्या र सुन गायब प्रकरणको चर्चापछि अनुसन्धानका लागि सरकारले गृहमन्त्रालयका सहसचिवको नेतृत्वमा एक समिति बनाएको थियो ।

सोही समितिले सुन तस्करी प्रकरणमा प्रहरीका उच्च अधिकारीसहित गोरे समूहको संलग्नता देखाएको थियो । सोही समितिले विभिन्न समयमा ३८ क्विन्टल सुन तस्करी भएको निस्कर्ष निकालेको थियो । तर, गोरे समूहले ल्याएको भनिएको सुन हालसम्म भेटिएको छैन ।

समितिले तस्करीमा प्रहरीकै उच्च अधिकारीको समेत संलग्नता औंल्याएको थियो । जसमध्ये धेरैजसो प्रहरी अधिकारीले सफाई पाइसकेका छन् भने केही पूर्पक्षका लागि कारागारमै छन् ।

सनम शाक्य हत्या र सुन तस्करी प्रकरणमा ७७ जनालाई प्रतिवादी बनाइएको छ । जसमध्ये ५५ जना पक्राउ परेका छन् भने २२ जना अझै फरार छन् ।

संगठीत अपराध, अवैध कारोबार, अपहरण तथा शरीर बन्धक र कर्तव्य ज्यान गरेर चारवटा शीर्षकमा जिल्ला सरकारी वकिलको कार्यालय मोरङले २०७५ वैशाख १९ गते उच्च प्रहरी अधिकारीसहित ६३ जनाविरुद्ध मुद्दा दायर गरेको थियो । त्यसपछि दुईपटक पूरक अभियोगमार्फत ७७ जनालाई प्रतिवादी बनाएको हो ।

१७ अर्ब एक करोड ८० लाख करिब ३८ क्विन्टल सुन अवैध रुपमा आयात भएको निस्कर्ष सरकारको उच्चस्तरीय अनुसन्धान समितिले निकालेको थियो । सुन तस्करी प्रकरणमै जोडिएका त्रिभुवन विमानस्थलमा कार्यरत प्रेमनारायण चौधरीले प्रहरी हिरासतमै आत्महत्या गरेका थिए ।