दाङ । प्रविधिको विकाससँगै हुलाक कार्यालयमार्फत आदानप्रदान हुने व्यक्तिगत चिठीपत्रमा कमी आएको छ । एक ठाउँको सन्देश अर्को ठाउँमा पठाउनको लागि इन्टरनेट र मोबाइल फोन सजिलो माध्यम भएकाले व्यक्तिगत चिठीपत्रमा कमी आएको हो ।

व्यक्तिको नाममा दैनिक करिब १० प्रतिशत मात्र चिठीपत्र आउने गरेको जिल्ला हुलाक कार्यालय दाङका प्रमुख शोभाराम बस्नेतले जानकारी दिए । धेरैजसो सरकारी कार्यालयका चिठीपत्रहरू आदानप्रदानको काम हुने उनले बताए । ९० प्रतिशत चिठीपत्र विभिन्न संघ–संस्था तथा सरकारी कार्यालयका आउने गरेको उनको भनाइ छ ।

उनका अनुसार यहाँ हाल दैनिक सरदर २०० वटा चिठी आउँछन् । दाङका उपमहानगर, नगर, गाउँपालिका तथा वडाका पत्रहरू आउने गरेको उनले बताए । चिठीपत्रमा कमी आए पनि प्रविधिको विकाससँगै नयाँ काम तथा क्षेत्राधिकार बढेको प्रमुख बस्नेत बताउँछन् ।

केही वर्षयता सूचनाको हक कार्यान्वयनसम्बन्धी अनुगमन तथा रिपोर्टिङ, प्रेस प्रतिनिधि प्रमाणपत्र, अनलाइन सञ्चारमाध्यम, छापा माध्यमहरूको लोक कल्याणकारी विज्ञापनको रकम भुक्तानीलगायत काम पनि हुलाक कार्यालयमार्फत हुने गरेको बस्नेतले जानकारी दिए ।

यसअघि, चिठीपत्र आदानप्रदान, बचत बैंक सेवा, ५०० वाटसम्मको रेडियोको नवीकरणलगायत काम हुलाकमार्फत हुँदै आएको थियो ।

जिल्ला हुलाक कार्यालय दाङले बचत बैंक सेवा सञ्चालन गर्दै आएको छ । जसमा तीन करोड ३५ लाख पाँच हजार १९८ रुपैयाँ नगद जम्मा भएको छ भने दुई करोड ४६ लाख ३५ हजार ९४५ रुपैयाँ भुक्तानी गरिएको उनले बताए ।

चिठी इन्क्वायरी सिस्टम
जिल्ला हुलाक कार्यालयले चिठी इन्क्वायरी सिस्टम लागु गरेको छ । यो सिस्टमअन्तर्गत हुलाकमार्फत चिठी पठाएका व्यक्तिले आफूले पठाएको पत्र कहाँ गयो, कस्तो अवस्थामा छ भनेर घरमै बसेर जानकारी पाउन सक्छन् । कार्यालय प्रमुख बस्नेतले पोस्टल इन्टरनल ट्रयाकिङ सिस्टमबाट चिठीको अवस्थाको बारेमा थाहा पाउन सकिने जानकारी दिए ।

५७ लाख बढी राजस्व
जिल्ला हुलाक कार्यालय दाङमा एक वर्षमा ५७ लाख ७७ हजार ५१२ रुपैयाँ राजस्व संकलन भएको छ । गत आर्थिक वर्ष २०७७/०७८ मा उक्त राजस्व संकलन भएको कार्यालयले जनाएको छ ।

हुलाक टिकट बिक्रीबाट ४५ लाख ९९ हजार ४५५ रुपैयाँ, पार्सल भुक्तानी आम्दानीबाट ४८ हजार ८०६, रेडियो रोयल्टीबाट ७१ हजार १३८ रुपैयाँ संकलन भएको कार्यालय प्रमुख बस्नेतले जानकारी दिए ।

यस्तै, पत्रिका नवीकरणबाट एक हजार १०, पोस्टबक्स नवीकरणबाट तीन हजार, केबुल नवीकरणबाट २५ हजार, काउन्टर अटोमेसिन आम्दानी एक लाख ९९ हजार ५८५, केबुल रोयल्टीबाट ६ लाख ७८ हजार २८५, एफएम रेडियो इजाजत नवीकरणबाट चार हजार रुपैयाँ राजस्व संकलन भएको हो ।

घरबहाल आम्दानी एक लाख ४५ हजार २३४ र एफएम रेडियो लाइसेन्स नवीकरणबाट दुई हजार रुपैयाँ राजस्व संकलन भएको कार्यालय प्रमुख बस्नेतले बताए ।