जनकपुरधाम । जिल्ला प्रहरी कार्यालय धनुषाको हिरासतमा आत्महत्या गरेका लक्ष्मीनियाँ गाउँपालिका २ सिनुरजोडा पल्टु रविदासको परिवारले अझै शव बुझेका छैनन् । घटनाको चारदिन बिते पनि परिवारजन र स्थानीयले निष्पक्ष छानबीनको अडान राख्दै शव बुझेका छैनन् ।
 
प्रहरी कार्यालयको शौचालयमा पासो लगाई झुण्डिएको अवस्थामा उनको शव बिहीबार फेला परेको थियो । प्रहरीले मानव अधिकारकर्मी र स्थानीय जनप्रतिनिधिको रोहबरमा शव पोस्ट मार्डमको लागि प्रादेशिक अस्पताल जनकपुर पठाएको छ । पल्टुले डिप्रेशनमा रहेकाले आत्महत्या गरेको प्रहरीले दावी गर्दै आएको छ । तर, परिवारजनले प्रहरीले नै अघनुसँग मिलेर हत्या गरेको आरोप लगाएका छन् । गत चैतमा घरायसी विवाद हुँदा भाइ अघनु रविदासले कुटपीट तथा अङ्ग भङ्ग मुद्दा दर्ता गराएका थिए । 

 
पल्टु सुरुको केही समय फरार भए पनि गत असारमा पक्राउ परेका थिए । अदालतले दुई लाख धरौटी जरिवना गरिसकेको थियो । तर, धरौटी रकम नहुँदा परिवारले थुनामुक्त गराउन सकेको थिएन । प्रहरीले सिन्धुली करागार चलान गर्ने तयारी गरिरहेको थियो । 

यता, परिवारजनले निष्पक्ष छानबीन गरी दोषीलाई कारवाही हुनु पर्ने माग गर्दै दुई दिनदेखि जनकपुर–ढल्केवर सडक खण्डमा चक्का जामसँगै पर्दशनसमेत गरिरहेका छन् ।

पर्दशनमा स्थानीय नेकपा एमालेका नेता लालजी साह, श्याम यादव र रघुबिर महासेठविरुद्ध चर्को नारा बाजी गरेका छन् । आइतबार साँझ तीनै जना नेताको पुत्लासमेत जलाइएको थियो । डा. सिके राउत नेतृत्वको जनमत पार्टीले पनी धनुषाका प्रमुख जिल्ला अधिकारीलाई ध्यानाकषर्ण गराउँदै उच्चस्तरीय छानवीन गर्न माग गर्दै ज्ञापनपत्र बुझाएको छ । उनीहरुले जनकपुरमा हत्याको विरुद्धमा पर्दशनसमेत गरेका छन् ।