जनकपुरधाम । धनुषाको लक्ष्मीनियाँ गाउँपालिका–२, सिनुरजोडाका पल्टु रविदासले (महरा) गत चैत ११ गते दिनभरि काम गरे । साँझ घर पुगे । भाइ अघनु रविदासले खानेपानी (ह्यान्ड पाइप–कल)को विषय उठाए ।

कलको सरसफाइ र मर्मत–सम्भारमा नसघाएको भन्दै उनले पानी खान नदिने अडान लिए । विवाद हुन थाल्यो । दुवै दाजुभाइले मदिरा सेवन गरेका थिए । गाली–गलौजमा उत्रिए ।

पल्टुले काठको मुंग्रोले भाइ अघनुको टाउकोमा हिर्काए । अघनु तत्काल बेहोस भए, टाउकोबाट रगत बग्न थाल्यो । उपचारको लागि विराटनगर पठाइयो ।

गाउँमा भने घटनाको विषयमा राजनीतिकरण सुरु भयो । “त्यति बेला कांग्रेस पक्षका नेताहरुले पल्टुको बचाउ गर्न थाले । एमालेका नेताहरुले  अघनुलाई मुद्दा गर्न उक्साउन थाले,” वडाध्यक्ष गणेश यादवले भने, “तर, मेलमिलापको लागि कसैले सहकार्य गरेनन् । आफूले प्रयास गरे पनि त्यो सफल हुन् दिएनन् ।”

अस्पतालबाट डिस्चार्ज भएर आएपछि स्थानीय नेता लालजी यादवको सहयोगमा दाइ पल्टुमाथि धनुषा प्रहरीमा कुटपिट तथा अंगभंग मुद्दा दर्ता गराएको अघनुले बताए । “सहजै उपचार खर्च नदिँदा मुद्दा दर्ता गराएको थिएँ । स्थानीय नेता र जनप्रतिनिधिलाई पनि इलाज खर्च दिलाउन आग्रह गरेँ,” उनले भने, “तर, पैसा नदिँदा मुद्दा दर्ता गराए । यसमा मेरो के दोष ? ममाथि अन्याय भएको थियो । मैले न्याय पाउन मुद्दा गरेँ ।”

मुद्दा दर्ता भएपछि पल्टु डेढ महिना फरार भए । गएको असार २२ गते प्रहरीले पल्टुलाई पक्राउ ग¥यो । म्याद थप गरी अदालतमा हाजिर गरायो । गएको बुधबार अदालतले दुई लाख रुपैयाँ धरौटीमा रिहा गर्न आदेश दिएको जिल्ला प्रहरी कार्यालय धनुषाका प्रवक्ता एवं डीएसपी मकेन्द्र मिश्रले जानकारी दिए ।

उक्त रकमको जोहो गर्न पल्टुकी श्रीमती रेनु रविदास जुटिन् । स्थानीय साहुलाई गुहार गरिन् । तर, कसैले पैसा नदिएको उनले बताइन् । “कुनै पनि साहुले पैसा दिन मानेका थिएनन् । एकजना साहुसँग ३६ प्रतिशत ब्याजदरमा ५० हजार रुपैयाँ ऋण लिएको थिएँ,” उनले भनिन्, “अरु पैसाको जोहो गर्दै थिएँ । पैसा पुगेपछि छुटाउन जान्छु भने सोचेको थिएँ ।”

वडाध्यक्ष यादवले उनको परिवारिक अवस्थाबारे जानकारी दिँदै भने, “सम्पत्तिको नाममा दुई धुर घडेरी र त्यसमा ठडिएको फुसको झुपडीबाहेक अरु केही छैन । पल्टु धरौटी रकम बुझाउन नसक्ने चिन्ताले डिप्रेसनमा आएर आत्महत्या गरेको हुनसक्छ ।”

हिरासतमा आत्महत्या

पल्टुले गएको शुक्रबार बिहान करिब ४ बजे जिल्ला प्रहरी कार्यालय धनुषाको हिरासतमा आत्महत्या गरेको बताइएको छ । थुनुवाकक्षको शौचालयमा इनर (कपडा)ले पासो लगाई आत्महत्या गरेको प्रहरीले जनाएको छ । डीएसपी मिश्रका अनुसार बाल्टिनमाथि उभिएर भेन्टिलेसनमा पासो लगाई आत्महत्या गरेको देखिएको छ ।

मानवअधिकारकर्मी, स्थानीय जनप्रतिनिधि र परिवारजनको रोहबरमा शव निकालिएको थियो । शवलाई पोस्टमार्टमको लागि प्रादेशिक अस्पताल जनकपुर पठाइएको छ । तीन दिनपछि परिवारजनले धरौटी रकम बुझाएर उनलाई छुटाउने तयारी गरेका थिए ।

हत्याको आशंका

परिवारजनले हत्याको आशंका गरेका छन् । प्रहरीले विपक्षीसँग आर्थिक चलखेल गरी हिरासतभित्रै हत्या गराएको उनीहरुको आरोप छ । हत्याको आशंका गर्दै स्थानीयले जिल्ला प्रहरी कार्यालय र जिल्ला प्रशासन कार्यालयअगाडि प्रदर्शनसमेत गरेका छन् ।

शोकमा परिवार

पल्टुको मृत्युपछि परिवार शोकमा डुबेको छ । श्रीमती रेनु श्रीमान्लाई सम्झिएर भक्कानिएर रुन्छिन् । पटक–पटक मुर्छित हुन्छिन् । होस आएको बेला अन्याय भएको बताउँछिन् । प्रदर्शनमा सहभागी हुन्छिन् । छोराछोरी पाल्ने चिन्ताले उनलाई सताएको छ । पहिलो श्रीमतीको मृत्यु भएपछि पल्टुले रेनुसँग दोस्रो विवाह गरेका थिए । रेनुतर्फ दुई नबालक छोरी छन् ।